കോഴിക്കോട് സഹോദരിമാരുടെ കൊലപാതകം; പ്രതിയായ ഇളയ സഹോദരനെ മരിച്ച നിലയില്‍ കണ്ടെത്തി

കോഴിക്കോട് തടമ്പാട്ട്താഴത്ത് സഹോദരിമാരായ ശ്രീജയയെയും പുഷ്പലളിതയെയും കൊലപ്പെടുത്തിയ കേസിലെ മുഖ്യപ്രതിയും സഹോദരനുമായ പ്രമോദിനെ മരിച്ച നിലയില്‍ കണ്ടെത്തി. തലശ്ശേരി ബീച്ചില്‍ മൃതദേഹം കരയ്ക്കടിയുകയായിരുന്നു. സഹോദരിമാരെ കൊലപ്പെടുത്തിയ ശേഷം ഒളിവില്‍ പോയ പ്രമോദിനായി പോലീസ് തിരച്ചില്‍ നടത്തിവരികയായിരുന്നു.

ചേവായൂര്‍ പോലീസ് പ്രമോദിനായുള്ള അന്വേഷണം ഊര്‍ജിതമാക്കിയിരുന്നു. കഴിഞ്ഞ മൂന്ന് വര്‍ഷമായി തടമ്പാട്ട്താഴത്തെ വാടകവീട്ടില്‍ പ്രമോദിനൊപ്പമാണ് ശ്രീജയയും പുഷ്പലളിതയും താമസിച്ചിരുന്നത്. പുലര്‍ച്ചെ അഞ്ചുമണിയോടെ സഹോദരിമാരിലൊരാള്‍ മരിച്ചെന്ന് പ്രമോദ് തന്നെയാണ് ബന്ധുക്കളെ അറിയിച്ചത്. ബന്ധുക്കളെത്തി പരിശോധിച്ചപ്പോഴാണ് രണ്ട് പേരെയും മരിച്ച നിലയില്‍ കണ്ടെത്തിയത്.

പോസ്റ്റ്‌മോര്‍ട്ടം റിപ്പോര്‍ട്ടിലാണ് സഹോദരിമാര്‍ ശ്വാസം മുട്ടിയാണ് മരിച്ചതെന്ന് സ്ഥിരീകരിച്ചത്. ഇതോടെയാണ് സംഭവം കൊലപാതകമാണെന്ന് പോലീസ് തിരിച്ചറിഞ്ഞത്. തനിക്കെന്തെങ്കിലും സംഭവിച്ചാല്‍ സഹോദരിമാര്‍ ഒറ്റപ്പെട്ടുപോകുമോ എന്ന ഭയമാണ് കൊലപാതകത്തിന് പ്രേരിപ്പിച്ചതെന്നാണ് പോലീസിന്റെ പ്രാഥമിക നിഗമനം.