അപകീര്‍ത്തിപ്പെടുത്താന്‍ ശ്രമിക്കുന്നു; കുക്കു പരമേശ്വരന്‍ ഡിജിപിക്കും വനിതാ കമ്മിഷനും പരാതി നല്‍കി

തിരുവനന്തപുരം: യുട്യൂബ് ചാനലുകളിലൂടെ തനിക്കെതിരെയുണ്ടായ ആരോപണങ്ങളില്‍ നിയമനടപടി വേണമെന്ന് ആവശ്യപ്പെട്ട് കുക്കു പരമേശ്വരന്‍ ഡിജിപിക്കും വനിതാ കമ്മിഷനും പരാതി നല്‍കി.  അമ്മയുടെ തിരഞ്ഞെടുപ്പില്‍ മത്സരിക്കുന്നതില്‍ നിന്ന് തന്നെ മാറ്റി നിര്‍ത്താനും അപകീര്‍ത്തിപ്പെടുത്താനും ശ്രമമുണ്ടെന്നു ചൂണ്ടികാട്ടിയാണ് നടി കുക്കു പരമേശ്വരന്‍ പരാതി നല്‍കിയത്.

2018ല്‍ സ്ത്രീകൂട്ടായ്മ ഉണ്ടാക്കുന്നതിനായി കെപിഎസി ലളിതയുടെ നേതൃത്വത്തില്‍ അമ്മ സബ് കമ്മിറ്റി രൂപീകരിച്ചിരുന്നു. കെപിഎസി ലളിത ആവശ്യപ്പെട്ടതുനസരിച്ച് നടി പൊന്നമ്മ ബാബുവാണ് തന്നെ വിളിച്ചത്. അമ്മയുടെ ഭാരവാഹി ആയിരുന്ന ഇടവേള ബാബുവും പങ്കെടുക്കണമെന്ന് അറിയിച്ചതായി നടി നല്‍കിയ പരാതിയില്‍ പറയുന്നു. 

കൊച്ചിയിലെ ഒരു ഹോട്ടലില്‍ നടന്ന കൂട്ടായ്മയിലെ സംഭാഷണങ്ങള്‍ ക്യാമറയില്‍ റെക്കോര്‍ഡ് ചെയ്തിരുന്നു. ഇത് ഒരു യുട്യൂബ് ചാനലിലൂടെ പുറത്തുവന്നു. തങ്ങള്‍ സംസാരിച്ച പുരുഷന്മാരുടെ പേരുകളാണ് ചോര്‍ന്നത്. ഇതോടെ എല്ലാ ജില്ലകളിലും കൂട്ടായ്മയുടെ സബ് കമ്മിറ്റികള്‍ രൂപീകരിക്കണമെന്ന തീരുമാനം ഉപേക്ഷിച്ചു. പിന്നീട് ഇതുവരെ അക്കാര്യങ്ങള്‍ ചര്‍ച്ചയായില്ല. അന്ന് ക്യാമറയില്‍ ചിത്രീകരിച്ചതിന്റെ മെമ്മറി കാര്‍ഡ് ഹാജരാക്കണമെന്നാണ് ആവശ്യം. മെമ്മറി കാര്‍ഡ് തന്നെ ആരും ഏല്‍പ്പിച്ചിട്ടില്ല. അത് കെപിഎസി ലളിത വാങ്ങിയിട്ടുണ്ടാകും എന്നാണ് കരുതുന്നതെന്നും നടി പറഞ്ഞു.