പാലിയേക്കര ടോള്‍ പിരിവ് താല്‍ക്കാലികമായി നിര്‍ത്തിവെക്കാന്‍ ഹൈക്കോടതി ഉത്തരവ്

കൊച്ചി: പാലിയേക്കരയില്‍ ടോള്‍ പിരിവ് താല്‍ക്കാലികമായി നിര്‍ത്തണമെന്ന് ആവശ്യപ്പെട്ട ഹര്‍ജിയില്‍ ഹൈക്കോടതി ഇടപെട്ടു. മണ്ണുത്തി-ഇടപ്പള്ളി ദേശീയപാതയില്‍ അടിപ്പാത നിര്‍മാണം നടക്കുന്നതിനാല്‍, ടോള്‍ പിരിവ് നാല് ആഴ്ചത്തേക്ക് തടയണമെന്ന് ഹൈക്കോടതി ഡിവിഷന്‍ ബെഞ്ച് ഉത്തരവിട്ടു.

പൊതുപ്രവര്‍ത്തകനായ അഡ്വ. ഷാജി കോടങ്കണ്ടത് സമര്‍പ്പിച്ച ഹര്‍ജിയിലാണ് തീരുമാനം. നിര്‍മാണപ്രവര്‍ത്തനങ്ങള്‍ മൂലം റോഡുകളുടെ അവസ്ഥ തകര്‍ന്നതും ഗതാഗതക്കുരുക്ക് രൂക്ഷമായതും ഹൈക്കോടതി ചൂണ്ടിക്കാണിച്ചു. ഇത്തരത്തിലുള്ള സാഹചര്യത്തില്‍ ടോള്‍ പിരിവ് നീതിയില്ലാത്തതാണെന്ന് ഹര്‍ജിക്കാരന്‍ വ്യക്തമാക്കിയിരുന്നു.

ഇതിന് മുമ്പ് ഗതാഗതക്കുരുക്ക് കുറയ്ക്കാനുള്ള നടപടികളില്‍ ദേശീയപാത അതോറിറ്റിക്ക് വീഴ്ച വന്നതായും ഹൈക്കോടതി നിരീക്ഷിച്ചിരുന്നു.