നിയമസഭാ കയ്യാങ്കളി കേസിൽ ട്വിസ്റ്റ്: കോൺഗ്രസ് മുൻ എം.എൽ.എമാർക്കെതിരായ കേസ് ഹൈക്കോടതി റദ്ദാക്കി

കൊച്ചി: രാജ്യത്താകെ കേരളത്തിന്‌ നാണക്കേടുണ്ടാക്കിയ സംഭവമാണ് 2015 മാർച്ച് 13നുണ്ടായ നിയമസഭ കയ്യാംകളി കേസ്. കേരള നിയമസഭയുടെ മഹത്വത്തെയും അംഗങ്ങളുടെ മാന്യതയെയും സമൂഹത്തിൽ വലിച്ചിഴച്ചു വലിയ ചർച്ചയായ സംഭവം ആയിരുന്നു അത്. 

സി.പി.എം അംഗങ്ങൾ പ്രതിയായി കേസിൽ പിന്നീട് മൂന്ന് കോൺഗ്രസ്‌ എം.എൽ.എ മാരേക്കൂടി പ്രതി ചേർത്തു. ഇടത് വനിതാ എം.എൽ.എമാരെ കയ്യേറ്റം ചെയ്തെന്നാരോപിച്ചായിരുന്നു കേസ്. കേസ് കെട്ടിചമ്മച്ചതാണെന്നു കണ്ടെത്തിയതോടെ കോൺഗ്രസ് മുൻ എം.എൽ.എമാർക്കെതിരെ എടുത്ത കേസ് ഹൈക്കോടതി ഇപ്പോൾ റദ്ദാക്കിയിരിക്കുകയാണ്. 

കേസെടുത്തതിനെതിരെ മുൻ എം.എൽ.എമാരായ എം.എ. വാഹിദ്, ഡൊമിനിക് പ്രസന്റേഷൻ, കെ.ശിവദാസൻ നായർ എന്നിവർ നൽകിയ ഹർജി പരിഗണിച്ചാണ് ജസ്റ്റിസ് പി.വി.കുഞ്ഞികൃഷ്ണന്റെ ഉത്തരവ്. വനിതാ നേതാക്കളായ കെ.കെ. ലതിക, ജമീല പ്രകാശം തുടങ്ങിയവരെ കയ്യേറ്റം ചെയ്തു, തടഞ്ഞുവച്ചു എന്നായിരുന്നു കേസ്.

2015 മാർച്ച് 13ന് സംസ്ഥാന ബജറ്റ് അവതരണത്തിനിടെ ആയിരുന്നു സംഭവം. അന്തരിച്ച മുൻ ധനമന്ത്രി കെ.എം. മാണി ബാർ കോഴക്കേസിലെ പ്രതിയാണെന്ന് ആരോപിച്ച് ബജറ്റ് അവതരണം തടയാൻ പ്രതിപക്ഷം നടത്തിയ ശ്രമം വലിയ കയ്യാങ്കളിയിലെത്തിയിരുന്നു. 

തുടർന്ന് ഇന്നത്തെ വിദ്യാഭ്യാസ മന്ത്രി വി.ശിവൻകുട്ടി, മുൻ മന്ത്രിമാരായ ഇ.പി. ജയരാജൻ, കെ.ടി. ജലീൽ എന്നിവരടക്കമുള്ളവർക്കെതിരെ പോലീസ് കേസെടുത്തു. 

ഇടത് എം.എൽ.എമാർ മാത്രം പ്രതികളായ കേസിൽ 2023ലാണ് കോൺഗ്രസ് നേതാക്കളെയും പ്രതി ചേർക്കാൻ തീരുമാനിക്കുന്നത്. ഇതിനെതിരെയാണ് കോൺഗ്രസ് മുൻ എംഎൽഎമാർ ഹൈക്കോടതിയെ സമീപിച്ചത്.