മോഷണാരോപണം: പെരുമ്പാവൂരില്‍ അതിഥി തൊഴിലാളിയെ സംഘം ചേര്‍ന്ന് മര്‍ദിച്ച് കൊലപ്പെടുത്തി

പെരുമ്പാവൂര്‍: മോഷണാരോപണത്തെ തുടര്‍ന്ന് അതിഥി തൊഴിലാളിയെ സംഘം ചേര്‍ന്ന് ക്രൂരമായി മര്‍ദിച്ച് കൊലപ്പെടുത്തി. പെരുമ്പാവൂരിലാണ് സംഭവം. സംഭവത്തില്‍ ആറ് അതിഥി തൊഴിലാളികളെ പൊലീസ് കസ്റ്റഡിയില്‍ എടുത്തിട്ടുണ്ട്.

അസാം സ്വദേശികളായ അലാവുദ്ദീന്‍, മിനാരുള്‍, സാക്കിര്‍ ഹുസൈന്‍, ഹബീസുദീന്‍, ഹസന്‍ അലി, മുസമ്മില്‍ എന്നിവരാണ് പെരുമ്പാവൂര്‍ പൊലീസിന്റെ കസ്റ്റഡിയില്‍ ഉള്ളത്. പ്രതികള്‍ താമസിച്ചിരുന്ന മുറിയില്‍ നിന്ന് മൊബൈല്‍ ഫോണുകള്‍ എടുത്തുവെന്നാരോപിച്ചാണ് മര്‍ദനം നടത്തിയത്.

മരത്തടിയുടെ റോളര്‍ ഉപയോഗിച്ച് ക്രൂരമായി മര്‍ദിച്ചെന്നാണ് വിവരം. മര്‍ദനത്തില്‍ തൊഴിലാളിയുടെ പല്ലുകളും തലയും ഗുരുതരമായി പരിക്കേറ്റു. ശബ്ദം കേട്ട് സമീപത്തുണ്ടായിരുന്നവര്‍ മുറിയിലേക്ക് എത്തിയതോടെയാണ് സംഭവം പുറത്ത് അറിയുന്നത്. ചൊവ്വാഴ്ച രാത്രിയോടെയാണ് ക്രൂരമായ സംഭവം നടന്നത്.

ഏഴ് മൊബൈല്‍ ഫോണുകളും ഏകദേശം ഒരു ലക്ഷം രൂപയും മോഷ്ടിച്ചതായി പ്രതികള്‍ ആരോപിച്ചെങ്കിലും ഇതുമായി ബന്ധപ്പെട്ട വ്യക്തമായ തെളിവുകള്‍ പൊലീസിന് ഇതുവരെ ലഭിച്ചിട്ടില്ല. കൊല്ലപ്പെട്ട തൊഴിലാളിയുടെ മൃതദേഹം സമീപത്തെ സ്വകാര്യ ആശുപത്രിയിലേക്ക് മാറ്റിയിരിക്കുകയാണ്.