കാഠ്മണ്ഡു: മിന്നല്പ്രളയം കൊടുംനാശം വിതച്ച നേപ്പാളില് മരണസംഖ്യ 734 ആയി. ഹിമതടാകം പൊട്ടുമെന്ന ആശങ്ക നിലനില്ക്കെ, കാണാതായ മൂവായിരത്തിലധികം പേര്ക്കായി അഞ്ചാം ദിനത്തിലും രാപകല് തിരച്ചില് തുടരുകയാണ്. ഏഴ് മലയാളികള് ഉള്പ്പെടെ 278 ഇന്ത്യക്കാരെയാണ് ഇനി കണ്ടെത്താനുള്ളത്. ഇതിനുപുറമേ, ടിബറ്റ് മേഖലയില് 49 ഇന്ത്യക്കാര് അടക്കം 261 വിദേശികളെ കാണാതായിട്ടുണ്ടെന്ന് ചൈന വ്യക്തമാക്കി.
അതേസമയം, ഉത്തര്പ്രദേശിലും മധ്യപ്രദേശിലും കനത്ത മഴ തുടരുകയാണ്. യുപിയില് മന്ദാകിനി നദി കരകവിഞ്ഞതിനെ തുടര്ന്ന് വീടുകളും കടകളും ക്ഷേത്രങ്ങളും വെള്ളത്തിനടിയിലായി. ചിത്രകൂടില് സൈന്യത്തിന്റെ ഹെലികോപ്റ്റര് ഉപയോഗിച്ചാണ് രക്ഷാപ്രവര്ത്തനം പുരോഗമിക്കുന്നത്. മധ്യപ്രദേശില് നാല് ജില്ലകളില് പ്രളയക്കെടുതി രൂക്ഷമാണ്.
നേപ്പാളിലേക്ക് ഇന്ത്യയുടെ നാലാമത്തെ വ്യോമസേനാ വിമാനവും ഇന്നലെ പുറപ്പെട്ടു. പുതപ്പുകള്, സ്ലീപ്പിങ് ബാഗുകള്, ടാര്പോളിന്, ശുചിത്വ കിറ്റുകള് തുടങ്ങിയ 11 ടണ് ദുരിതാശ്വാസ സാമഗ്രികളുമായി സി-130 വിമാനമാണ് പുറപ്പെട്ടത്. അതിനിടെ, നേപ്പാളില് കുടുങ്ങിയ കണ്ണൂര്, കാസര്ഗോഡ്, കോട്ടയം, എറണാകുളം സ്വദേശികളായ 36 അംഗ മലയാളി സംഘം പുലര്ച്ചെ 2:15-ഓടെ കൊച്ചി അന്താരാഷ്ട്ര വിമാനത്താവളത്തില് സുരക്ഷിതരായി തിരിച്ചെത്തി.
Comments
No comments yet. Be the first to comment!
Leave a Comment