തിരുവനന്തപുരം: സംസ്ഥാനത്ത് ഇന്ന് പരക്കെ ശക്തമായ മഴയ്ക്ക് സാധ്യതയുണ്ടെന്ന് കേന്ദ്ര കാലാവസ്ഥാ വകുപ്പ് അറിയിച്ചു. ഇതിന്റെ പശ്ചാത്തലത്തില് വടക്കന് കേരളത്തിലെയും മധ്യകേരളത്തിലെയും ആറ് ജില്ലകളില് യെല്ലോ അലര്ട്ട് പ്രഖ്യാപിച്ചിട്ടുണ്ട്.
കാസര്കോട്, കണ്ണൂര്, കോഴിക്കോട്, മലപ്പുറം, തൃശൂര്, എറണാകുളം എന്നീ ജില്ലകളിലാണ് മഴ മുന്നറിയിപ്പ് നല്കിയിട്ടുള്ളത്. ഒറ്റപ്പെട്ട ഇടങ്ങളില് ശക്തമായ മഴയ്ക്കൊപ്പം ഇടിമിന്നലിനും സാധ്യതയുണ്ടെന്ന് കേന്ദ്ര കാലാവസ്ഥാ വകുപ്പിന്റെ മുന്നറിയിപ്പില് പറയുന്നു. ഇതിനാല് പൊതുജനങ്ങള് ജാഗ്രത പാലിക്കണമെന്ന് ദുരന്തനിവാരണ അതോറിറ്റി നിര്ദേശിച്ചു.
ഇടിമിന്നലുള്ള സമയത്ത് സുരക്ഷിതമായ കെട്ടിടങ്ങള്ക്കുള്ളിലേക്ക് മാറിനില്ക്കാനും, തുറസായ സ്ഥലങ്ങളില് നില്ക്കുന്നത് പൂര്ണ്ണമായും ഒഴിവാക്കാനും കാലാവസ്ഥാ വകുപ്പ് നിര്ദേശിക്കുന്നു.ആവശ്യമില്ലാത്ത യാത്രകള് ഒഴിവാക്കാനും, ജലാശയങ്ങള്ക്ക് സമീപവും മലയോര മേഖലകളിലും പ്രത്യേക ശ്രദ്ധ പുലര്ത്താനും പൊതുജനങ്ങള്ക്ക് മുന്നറിയിപ്പ് നല്കിയിട്ടുണ്ട്. മഴയോടൊപ്പം ശക്തമായ കാറ്റിനും സാധ്യതയുള്ളതിനാല് കാറ്റില് മരങ്ങളോ ബോര്ഡുകളോ കടപുഴകി വീഴാന് സാധ്യതയുള്ള ഇടങ്ങളില് നിന്ന് മാറിനില്ക്കാനും അധികൃതര് ആവശ്യപ്പെട്ടു.
Comments
No comments yet. Be the first to comment!
Leave a Comment