ദില്ലി: 2047ഓടെ വികസിത ഭാരതം എന്ന ലക്ഷ്യം യാഥാര്‍ഥ്യമാക്കുമെന്ന് പ്രധാനമന്ത്രി നരേന്ദ്ര മോദി. ഇന്ത്യയില്‍ ഒളിംപിക്‌സ് സംഘടിപ്പിക്കുമെന്നും ബഹിരാകാശത്തേക്ക് മനുഷ്യനെ അയക്കുന്നതിനുള്ള പദ്ധതികള്‍ പുരോഗമിക്കുകയാണെന്നും അദ്ദേഹം പറഞ്ഞു. മുഖ്യമന്ത്രിയായും പ്രധാനമന്ത്രിയായും അധികാരത്തിലിരിക്കുന്നതിന്റെ 25-ാം വാര്‍ഷികത്തോടനുബന്ധിച്ച് സംഘടിപ്പിച്ച വികസിത് ഭാരത് സങ്കല്‍പ് സഭയില്‍ സംസാരിക്കുകയായിരുന്നു മോദി.
25 വര്‍ഷം ഭരണരംഗത്ത് ഉണ്ടാകുമെന്ന് സ്വപ്നത്തില്‍ പോലും കരുതിയിരുന്നില്ലെന്നും രാജ്യത്തെ ജനങ്ങള്‍ക്ക് നന്ദിയുണ്ടെന്നും മോദി പറഞ്ഞു. വോട്ട് ബാങ്ക് രാഷ്ട്രീയം താന്‍ നടത്തിയിട്ടില്ലെന്നും സംഘടനയ്ക്കുവേണ്ടി പ്രവര്‍ത്തിച്ചതാണ് തന്റെ രാഷ്ട്രീയ റിപ്പോര്‍ട്ട് കാര്‍ഡെന്നും അദ്ദേഹം വ്യക്തമാക്കി. തനിക്ക് നേരത്തെ തന്നെ രാഷ്ട്രീയത്തിലേക്ക് എത്താമായിരുന്നെങ്കിലും അതിലേക്ക് പ്രലോഭിപ്പിക്കപ്പെട്ടില്ലെന്നും ലഭിച്ച ഉത്തരവാദിത്വങ്ങളെല്ലാം പൂര്‍ത്തിയാക്കാന്‍ ശ്രമിച്ചിട്ടുണ്ടെന്നും മോദി പറഞ്ഞു.
സ്വാര്‍ത്ഥതയില്ലാത്ത പ്രവര്‍ത്തനമാണ് തന്റെ ലക്ഷ്യമെന്നും പ്രവര്‍ത്തിയാണ് തന്റെ മതമെന്നും പ്രധാനമന്ത്രി പറഞ്ഞു. രാജ്യത്തെ ഏറ്റവും വലിയ വെല്ലുവിളി വോട്ടിന്റെ പേരില്‍ സമൂഹത്തെ വിഭജിക്കുന്നതാണെന്നും അദ്ദേഹം അഭിപ്രായപ്പെട്ടു. വൈദ്യുതി ലഭ്യമല്ലാത്ത സാഹചര്യം ഒരു വിഭാഗത്തെ മാത്രമല്ല, എല്ലാവരെയും ബാധിക്കുമെന്നും ഇത്തരം പ്രശ്‌നങ്ങള്‍ക്ക് പരിഹാരം കാണാനാണ് സര്‍ക്കാര്‍ ശ്രമിക്കുന്നതെന്നും മോദി പറഞ്ഞു.
ഇന്ത്യയെ ആഗോള ഉല്‍പ്പാദന ഹബ്ബാക്കി മാറ്റുകയാണ് ലക്ഷ്യമെന്നും ഇതിനായി ദീര്‍ഘവീക്ഷണമുള്ള നയങ്ങളും കഠിനാധ്വാനവും ആവശ്യമാണെന്നും പ്രധാനമന്ത്രി പറഞ്ഞു. ഇന്ത്യയ്ക്ക് മുന്നില്‍ വലിയ വെല്ലുവിളികളുണ്ടെങ്കിലും 140 കോടി ജനങ്ങളുടെ പരിഹാരശേഷിയുണ്ടെന്നും അദ്ദേഹം കൂട്ടിച്ചേര്‍ത്തു.
ഫ്‌ലൈ ദുബായ് വിമാനത്തിലെ പൈലറ്റ് സ്മിത് മച്ഛറിനെ മോദി വീണ്ടും പ്രശംസിച്ചു. ഇപ്പോള്‍ ലോകം സംസാരിക്കുന്നത് ഒരു ഇന്ത്യന്‍ പൈലറ്റിനെക്കുറിച്ചാണെന്നും ഭാവിയില്‍ ഇന്ത്യന്‍ നിര്‍മിത വിമാനങ്ങളെക്കുറിച്ച് ലോകം സംസാരിക്കുന്ന കാലം വരുമെന്നും അദ്ദേഹം പറഞ്ഞു.
2001ലാണ് നരേന്ദ്ര മോദി ഗുജറാത്ത് മുഖ്യമന്ത്രിയായി അധികാരമേറ്റത്. മുഖ്യമന്ത്രിയായും പ്രധാനമന്ത്രിയായും അധികാരത്തിലിരിക്കുന്നതിന്റെ 25-ാം വാര്‍ഷികത്തിന്റെ ഭാഗമായി ബിജെപി രാജ്യവ്യാപകമായി വിവിധ പരിപാടികള്‍ സംഘടിപ്പിക്കുന്നുണ്ട്.
Comments
No comments yet. Be the first to comment!
Leave a Comment