കൊച്ചി: എസ്എഫ്‌ഐ നേതാവ് അഭിമന്യു വധക്കേസില്‍ രഹസ്യവിചാരണ ആവശ്യപ്പെട്ട് പ്രതികള്‍ നല്‍കിയ ഹരജി ഹൈക്കോടതി തള്ളി. ക്യാമ്പസ് ഫ്രണ്ട്, പോപ്പുലര്‍ ഫ്രണ്ട് പ്രവര്‍ത്തകരായ പ്രതികള്‍ സമര്‍പ്പിച്ച ഹരജിയാണ് കോടതി നിരസിച്ചത്. കേസ് അടച്ചിട്ട മുറിയില്‍ വിചാരണ ചെയ്യണമെന്ന ആവശ്യം നേരത്തെ എറണാകുളം പ്രിന്‍സിപ്പല്‍ സെഷന്‍സ് കോടതിയും തള്ളിയിരുന്നു. ഇതോടെ കേസിന്റെ വിചാരണ തുറന്ന കോടതിയില്‍ തന്നെ തുടരും.
2018 ജൂലൈ 2-ന് പുലര്‍ച്ചെയാണ് എറണാകുളം മഹാരാജാസ് കോളേജിലെ രണ്ടാം വര്‍ഷ ബിരുദ വിദ്യാര്‍ഥിയും എസ്എഫ്‌ഐ ഇടുക്കി ജില്ലാ കമ്മിറ്റി അംഗവുമായ അഭിമന്യു കൊല്ലപ്പെടുന്നത്. ഇടുക്കി വട്ടവട സ്വദേശിയാണ് അഭിമന്യു.
പുതിയ അധ്യയന വര്‍ഷം ആരംഭിക്കുന്നതിന് മുന്നോടിയായി കോളേജ് മതിലില്‍ ചുവരെഴുതുന്നതിനെയും പോസ്റ്റര്‍ പതിക്കുന്നതിനെയും ചൊല്ലിയുണ്ടായ തര്‍ക്കമാണ് അക്രമത്തില്‍ കലാശിച്ചത്. ക്യാമ്പസിന് സമീപം ഉണ്ടായ സംഘര്‍ഷത്തിനിടെ സ്ഥലത്തെത്തിയ അഭിമന്യുവിന് നെഞ്ചില്‍ മാരകമായി കുത്തേല്‍ക്കുകയായിരുന്നു. ആശുപത്രിയില്‍ എത്തിച്ചെങ്കിലും ജീവന്‍ രക്ഷിക്കാനായില്ല. അക്രമത്തില്‍ അര്‍ജുന്‍ എന്ന മറ്റൊരു വിദ്യാര്‍ഥിക്കും കുത്തേറ്റിരുന്നു. സംഭവസ്ഥലത്തെ സിസിടിവി ദൃശ്യങ്ങളും സാക്ഷിമൊഴികളും കേന്ദ്രീകരിച്ചാണ് പൊലീസ് അന്വേഷണം പൂര്‍ത്തിയാക്കിയത്.
Comments
No comments yet. Be the first to comment!
Leave a Comment