ഹൈദരാബാദ്: അതീവ സുരക്ഷാ മേഖലയായ ഹൈദരാബാദിലെ മദ്രാസ് റെജിമെന്റ് കേന്ദ്രത്തില് നിന്ന് ആയുധങ്ങളും വെടിയുണ്ടകളും മോഷണം പോയ സംഭവത്തില് ഗുരുതര സുരക്ഷാവീഴ്ച. സെക്കന്തരാബാദ് കന്റോണ്മെന്റിലെ സൈനിക കേന്ദ്രത്തില് നിന്ന് എകെ-47 റൈഫിളുകളും പിസ്റ്റളുകളും ഇന്സാസ് റൈഫിളും ഉള്പ്പെടെ നിരവധി ആയുധങ്ങളാണ് കാണാതായത്.
ഞായറാഴ്ച രാത്രിയാണ് ആയുധങ്ങള് സൂക്ഷിച്ചിരുന്ന മുറിയുടെ പൂട്ടും വാതിലും തകര്ത്ത നിലയില് കണ്ടെത്തിയത്. തുടര്ന്ന് സൈനിക ഉദ്യോഗസ്ഥര് നല്കിയ പരാതിയുടെ അടിസ്ഥാനത്തില് തിങ്കളാഴ്ച ബൊല്ലാരം പൊലീസ് കേസ് രജിസ്റ്റര് ചെയ്തു. സംഭവത്തില് സൈന്യവും പൊലീസും സംയുക്ത അന്വേഷണം ആരംഭിച്ചിട്ടുണ്ട്.
നിയന്ത്രിത പ്രതിരോധ മേഖലയിലാണ് സംഭവം നടന്നതെന്നതിനാല് അന്വേഷണവുമായി ബന്ധപ്പെട്ട വിവരങ്ങള് പൊലീസ് രഹസ്യമായി സൂക്ഷിക്കുകയാണ്. ആയുധങ്ങള് സൂക്ഷിക്കുന്ന വിഭാഗത്തിലേക്കുള്ള പ്രവേശനം കര്ശനമായി നിയന്ത്രിച്ചിരിക്കുന്ന സാഹചര്യത്തില്, സംഭവത്തിന് അകത്തുനിന്നുള്ള സഹായമുണ്ടായിരിക്കാമെന്ന സംശയവും ഉയരുന്നുണ്ട്.
വിവരമുള്ള ആരുടെയെങ്കിലും പങ്കാളിത്തം ഉണ്ടായിട്ടുണ്ടോയെന്നതടക്കമുള്ള കാര്യങ്ങള് അന്വേഷണ സംഘം പരിശോധിക്കുന്നുണ്ട്. സംഭവത്തിന് പിന്നാലെ ആര്മി ഇന്റലിജന്സും വിവരശേഖരണം ആരംഭിച്ചു. മാല്ക്കാജ്ഗിരി പൊലീസ് കമ്മീഷണറേറ്റിലെ ഉന്നത ഉദ്യോഗസ്ഥരുടെ മേല്നോട്ടത്തിലാണ് അന്വേഷണം പുരോഗമിക്കുന്നത്.
Comments
No comments yet. Be the first to comment!
Leave a Comment