കോഴിക്കോട്: മയക്കുമരുന്ന് ഇടപാടുമായി ബന്ധപ്പെട്ട സാമ്പത്തിക ഇടപാടുകളുടെ അന്വേഷണത്തില് അറസ്റ്റിലായ രണ്ടാം അധ്യാപികയെയും സര്വീസില് നിന്ന് പുറത്താക്കി. കൂരാച്ചുണ്ട് സ്വദേശിനിയും പേരാമ്പ്ര ബി.ആര്.സി.യിലെ സ്പെഷ്യല് എഡ്യൂക്കേറ്ററുമായ കാവ്യയെയാണ് സര്വീസില് നിന്ന് പുറത്താക്കിയത്. ഇതേ കേസില് അറസ്റ്റിലായ സഹപ്രവര്ത്തക കീര്ത്തനയെ കഴിഞ്ഞ ദിവസം തന്നെ സര്വീസില് നിന്ന് പുറത്താക്കിയിരുന്നു.
വടകര പൊലീസിന്റെ അന്വേഷണത്തിലാണ് കാവ്യയും മരുതോങ്കര സ്വദേശിനിയായ കീര്ത്തനയും പിടിയിലായത്. ആദ്യം അറസ്റ്റിലായ കീര്ത്തനയെ ചോദ്യം ചെയ്തതോടെയാണ് അന്വേഷണം കാവ്യയിലേക്ക് വ്യാപിച്ചതെന്ന് പൊലീസ് അറിയിച്ചു.
മയക്കുമരുന്ന് വാങ്ങുന്നവരില് നിന്ന് പണം സ്വീകരിക്കുന്നതിനായി പ്രതികള് ബാങ്ക് അക്കൗണ്ടുകള് ഉപയോഗിച്ചിരുന്നതായാണ് അന്വേഷണത്തില് കണ്ടെത്തിയത്. ആവശ്യക്കാര് പണം അക്കൗണ്ടിലേക്ക് അയച്ചശേഷം, തുക ലഭിച്ചതായി ഉറപ്പാക്കിയതിന് പിന്നാലെ മറ്റൊരാള് മുഖേന ലഹരിമരുന്ന് കൈമാറുന്ന രീതിയിലായിരുന്നു ഇടപാടുകള് നടന്നിരുന്നത്. ഇരുവരുടെയും അക്കൗണ്ടുകള് വഴി ലക്ഷക്കണക്കിന് രൂപയുടെ സാമ്പത്തിക ഇടപാടുകള് നടന്നതായും പൊലീസ് കണ്ടെത്തിയിട്ടുണ്ട്.
ഇരുവരെയും ഒരുമിച്ച് കസ്റ്റഡിയില് വാങ്ങി വിശദമായി ചോദ്യം ചെയ്യാനാണ് അന്വേഷണസംഘത്തിന്റെ നീക്കം. ഇതിലൂടെ കേസില് കൂടുതല് പേര്ക്ക് പങ്കുണ്ടോയെന്ന കാര്യത്തില് വ്യക്തത ലഭിക്കുമെന്നാണ് പൊലീസ് പ്രതീക്ഷിക്കുന്നത്.
Comments
No comments yet. Be the first to comment!
Leave a Comment