തിരുവനന്തപുരം: കേരളത്തിന്റെ അടുത്ത മുഖ്യമന്ത്രി ആരാണെന്ന കാര്യത്തില് ഞായറാഴ്ചയോടെ അന്തിമ തീരുമാനമുണ്ടാകും. മെയ് പത്താം തീയതിയോടെ പ്രഖ്യാപനം ഉണ്ടാകുമെന്ന് എഐസിസി നിരീക്ഷകരുമായുള്ള കൂടിക്കാഴ്ചയ്ക്ക് ശേഷം കെ. മുരളീധരന് മാധ്യമങ്ങളോട് പ്രതികരിച്ചു. മുഖ്യമന്ത്രിയെ സംബന്ധിച്ച ഔദ്യോഗിക പ്രഖ്യാപനം ഞായറാഴ്ച എഐസിസി നടത്തുമെന്നാണ് നിലവിലെ സൂചന. ഹൈക്കമാന്ഡ് നിരീക്ഷകരുടെ സാന്നിധ്യത്തില് എംഎല്എമാരുടെ അഭിപ്രായം തേടിയ ശേഷമായിരിക്കും അന്തിമ തീരുമാനം എടുക്കുക.
മുഖ്യമന്ത്രിയെ തിരഞ്ഞെടുക്കുന്നതിനുള്ള നടപടിക്രമങ്ങളുടെ ഭാഗമായി എഐസിസി നിരീക്ഷകരായ മുകുള് വാസ്നിക്കും അജയ് മാക്കനും എംഎല്എമാരുമായി കൂടിക്കാഴ്ച ആരംഭിച്ചു. ഓരോ എംഎല്എമാരെയും വ്യക്തിപരമായി കണ്ട് അഭിപ്രായം തേടുന്ന രീതിയാണ് നിരീക്ഷകര് സ്വീകരിക്കുന്നത്. മുതിര്ന്ന നേതാക്കളും ഹോട്ടലിലെത്തി നിരീക്ഷകരുമായി ചര്ച്ച നടത്തിയിട്ടുണ്ട്. ഘടകകക്ഷികളുമായുള്ള നിര്ണായകമായ കൂടിക്കാഴ്ച ഇന്ന് വൈകുന്നേരം നടക്കും. യാതൊരുവിധ തര്ക്കങ്ങളുമില്ലാതെ ഐകകണ്ഠ്യേനയുള്ള തീരുമാനം വരുമെന്നാണ് എംഎല്എമാരുടെ പ്രതീക്ഷ. മുഖ്യമന്ത്രിയെ നിശ്ചയിക്കാനുള്ള പൂര്ണ്ണ അധികാരം എഐസിസി പ്രസിഡന്റിനെ ചുമതലപ്പെടുത്തിക്കൊണ്ടുള്ള പ്രമേയവും പാസാക്കിയിട്ടുണ്ട്.
അതേസമയം, കോണ്ഗ്രസ് മന്ത്രിമാരുടെ കാര്യത്തില് അന്തിമ തീരുമാനമുണ്ടാകാന് കൂടുതല് സമയമെടുക്കും. ആദ്യഘട്ടത്തില് മുഖ്യമന്ത്രിയും ഘടകകക്ഷി മന്ത്രിമാരും മാത്രമായിരിക്കും സത്യപ്രതിജ്ഞ ചെയ്ത് അധികാരമേല്ക്കുക. മന്ത്രിസഭാ രൂപീകരണത്തില് ഹൈക്കമാന്ഡ് കര്ശനമായ മേല്നോട്ടം വഹിക്കുന്നുണ്ട്. ഗ്രൂപ്പ് താല്പര്യങ്ങള് മാറ്റിവെച്ച് മെറിറ്റ് മാത്രം മാനദണ്ഡമാക്കി മന്ത്രിമാരെ തീരുമാനിക്കണമെന്ന് രാഹുല് ഗാന്ധി നിര്ദേശം നല്കിയിട്ടുണ്ട്. മുഖ്യമന്ത്രിയെ ഔദ്യോഗികമായി തിരഞ്ഞെടുത്ത ശേഷം മാത്രമായിരിക്കും മന്ത്രിമാരുടെ കാര്യത്തില് വിശദമായ ചര്ച്ചകള് ആരംഭിക്കുക.
Comments
No comments yet. Be the first to comment!
Leave a Comment