കണ്ണൂര്: മുഴപ്പിലങ്ങാട്ടെ ബിജെപി പ്രവര്ത്തകന് എളമ്പിലായി സൂരജ് വധക്കേസില് എട്ട് പ്രതികള്ക്ക് ജീവപര്യന്തം. കേസില് രണ്ട് മുതല് ഒന്പത് വരെ പ്രതികള്ക്കാണ് ജീവപര്യന്തം. പതിനൊന്നാം പ്രതിക്ക് മൂന്ന് വര്ഷം കഠിന തടവിനും വിധിച്ചു. തലശ്ശേരി പ്രിന്സിപ്പല് സെഷന്സ് കോടതിയാണ് ശിക്ഷ വിധിച്ചത്.
രണ്ടു പതിറ്റാണ്ട് പൂര്ത്തിയാവാന് മാസങ്ങള് മാത്രം ശേഷിക്കുകയാണ് കേസില് തലശ്ശേരി പ്രിന്സിപ്പല് സെഷന്സ് കോടതി വിധി പറയുന്നത്. ആകെ 12 പ്രതികളാണ് കേസില് ഉണ്ടായിരുന്നത്. കേസിലെ ഒന്നാം പ്രതി പി.കെ ഷംസുദ്ദീനും, പന്ത്രണ്ടാം പ്രതി ടി.പി രവീന്ദ്രനും നേരത്തെ മരിച്ചിരുന്നു. പത്താം പ്രതിയെ കുറ്റക്കാരനല്ലന്ന് കണ്ട് കോടതി വെറുതെവിട്ടു.
2005 ആഗസ്റ്റ് 7നാണ് സൂരജ് കൊല്ലപ്പെട്ടത്. സിപിഎം വിട്ട് ബിജെപിയില് ചേര്ന്നതിന്റെ വൈരാഗ്യത്തില് സൂരജിനെ കൊലപ്പെടുത്തി എന്നാണ് കേസ്.കൊലപ്പെടുത്തുന്നതിന് ആറ് മാസം മുന്പും സൂരജിനെ സിപിഎം പ്രവര്ത്തകര് ആക്രമിച്ചിരുന്നു. അന്ന് കാലിന് വെട്ടേറ്റ സൂരജ് ആറ് മാസത്തോളം കിടപ്പിലായിരുന്നു. പിന്നീട് ഇദ്ദേഹം ചികിത്സ കഴിഞ്ഞ് പുറത്തിറങ്ങിയപ്പോഴാണ് വീണ്ടും ആക്രമിക്കപ്പെട്ടത്. കൊല്ലപ്പെടുമ്പോള് 32 വയസായിരുന്നു സൂരജിന്റെ പ്രായം.
ടി.കെ രജീഷ്. എന്.വി യാഗേഷ്, കെ ഷംജിത്ത്, നെയ്യോത്ത് സജീവന്, പണിക്കന്റവിട വീട്ടില് പ്രഭാകരന്, പുതുശേരി വീട്ടില് കെ.വി പത്മനാഭന്, മനോമ്പേത്ത് രാധാകൃഷ്ണന്, നാഗത്താന്കോട്ട പ്രകാശന്, പുതിയപുരയില് പ്രദീപന് എന്നിവരാണ് കേസിലെ പ്രതികള്.
Comments
No comments yet. Be the first to comment!
Leave a Comment