ബസുകളുടെ മത്സര ഓട്ടം; കൊച്ചിയില്‍ ബൈക്ക് യാത്രിക മരിച്ചു, ഭര്‍ത്താവിന് ഗുരുതര പരിക്ക്

കൊച്ചിയില്‍ ബസുകളുടെ മത്സരയോട്ടത്തിനിടെ ബൈക്ക് യാത്രികരായ ദമ്പതികള്‍ അപകടത്തില്‍പെട്ടു; യുവതിക്ക് ദാരുണാന്ത്യം സംഭവിച്ചു. സംഭവം എറണാകുളം മേനക ജംഗ്ഷനില്‍ വെച്ചാണ് നടന്നത്. ഭര്‍ത്താവ് ഗുരുതരമായി പരിക്കേറ്റ് ചികിത്സയിലാണ്.

36 വയസ്സുള്ള തോപ്പുംപടി സ്വദേശിനി സനിതയാണ് അപകടത്തില്‍ മരിച്ചത്. സനിതയും ഭര്‍ത്താവും സഞ്ചരിച്ചിരുന്ന ബൈക്കിനെ പുറകില്‍ നിന്ന് വന്ന ബസ് ഇടിക്കുകയായിരുന്നു. ഗുരുതരമായി പരുക്കേറ്റ ഇരുവരെയും ഉടന്‍ എറണാകുളം ജനറല്‍ ആശുപത്രിയില്‍ എത്തിച്ചെങ്കിലും സനിതയെ രക്ഷിക്കാനായില്ല.

അപകടത്തിന് കാരണം ഒരേ ഉടമസ്ഥതയിലുള്ള രണ്ട് ബസുകളുടെ മത്സരയോട്ടമാണെന്നാണ് ലഭിക്കുന്ന വിവരം. സംഭവത്തെക്കുറിച്ച് പൊലീസ് അന്വേഷണം ആരംഭിച്ചു.