മുനമ്പം വിഷത്തില് സര്ക്കാര് തീരുമാനങ്ങള്ക്കെതിരെ വീണ്ടും ചോദ്യവുമായി ഹൈക്കോടതി. മുനമ്പത്തേത് വഖഫ് വസ്തുവകയല്ലെന്ന് ജുഡീഷ്യല് കമ്മീഷന് കണ്ടെത്താനാകുമോ എന്നാണ് സര്ക്കാരിനോട് ഇപ്പോള് ഹൈക്കോടതി ചോദിച്ചിരിക്കുന്നത്. മുനമ്പം വിഷയത്തില് ജുഡീഷ്യല് അന്വേഷണ കമ്മീഷനെ നിയോഗിച്ച സര്ക്കാര് നടപടിക്കെതിരെ കേരള വഖഫ് സംരക്ഷണ വേദിയുടെ ഹര്ജി പരിഗണിക്കുമ്പോഴാണ് ജസ്റ്റിസ് ബെച്ചു കുര്യന് തോമസിന്റെ ബെഞ്ച് സര്ക്കാരിനോട് ചോദ്യങ്ങള് ഉന്നയിച്ചത്.
മുനമ്പത്തേത് വഖഫ് ഭൂമിയല്ലെന്ന് ജുഡീഷ്യല് കമ്മീഷന് കണ്ടെത്താനാകുമോ?. ടേം ഓഫ് റഫറന്സ് എവിടെ?. കുടിയിറക്കല് ഭീഷണി നേരിടുന്ന ആളുകള് കൈവശം വച്ചിരിക്കുന്ന രേഖകളുടെ നിയമപരമായ സാധുത എന്താണ് എന്നും കോടതി ചോദിച്ചു. നേരത്തെ മുനമ്പം വിഷയത്തില് ജുഡീഷ്യല് കമ്മീഷനെ നിയമിച്ച സര്ക്കാര് നിലപാടിനേയും കോടതി ചോദ്യം ചെയ്തിരുന്നു.
ജുഡീഷ്യറി അന്വേഷണ കമ്മീഷനെ സ്റ്റേ ചെയ്യണണെന്നാണ് ഹൈക്കോടതിക്ക് മുമ്പാകെയുള്ള ഹര്ജിയിലെ പ്രധാന ആവശ്യം. 2019 ല് വഖഫ് ബോര്ഡ്, ഭൂമി വഖഫ് സ്വത്തായി പ്രഖ്യാപിച്ചിട്ടുള്ളതാണ്. തീര്പ്പാക്കപ്പെട്ട സ്വത്തവകാശം വീണ്ടും തുറക്കാന് കഴിയില്ല. കോടതികള് വഖഫ് ആയി പ്രഖ്യാപിച്ച ഭൂമിയില് അന്വേഷണ കമ്മീഷന് രൂപീകരിക്കാന് സര്ക്കാരിന് അധികാരമില്ലെന്നും ഹര്ജിക്കാരന് പറയുന്നു.
എന്നാല് സര്ക്കാര് നിയോഗിച്ചത് അന്വേഷണ കമ്മീഷന് അല്ലെന്നും, വസ്തുതാ പരിശോധന കമ്മീഷനാണെന്നും അതിന് ജുഡീഷ്യല് അധികാരങ്ങളില്ലെന്നും സര്ക്കാര് കോടതിയെ അറിയിച്ചു. മുനമ്പം ഭൂമിയിലെ ജനങ്ങള് നേരിടുന്ന പ്രശ്നങ്ങള് സര്ക്കാരിന് മുന്നിലെത്തിക്കുകയാണ് ലക്ഷ്യം എന്നും സര്ക്കാര് വ്യക്തമാക്കി.
Comments
No comments yet. Be the first to comment!
Leave a Comment