തിരുവനന്തപുരം: സംസ്ഥാനത്തെ ഐഎഎസ് തലപ്പത്ത് വീണ്ടും നിര്‍ണ്ണായക അഴിച്ചുപണി. ശ്രീറാം സാംബശിവ റാവുവിന് പകരം എസ്. കാര്‍ത്തികേയനെ പുതിയ എക്‌സൈസ് കമ്മീഷണറായി നിയമിച്ചു. ഇതിന് പുറമെ ജലവിഭവ വകുപ്പിന്റെ സ്‌പെഷ്യല്‍ സെക്രട്ടറിയുടെ ചുമതലയും അദ്ദേഹത്തിന് നല്‍കിയിട്ടുണ്ട്. കെഎസ്ഇബി ചെയര്‍മാന്‍ എന്‍. പ്രശാന്തിന് മൃഗശാല, മ്യൂസിയം, പുരാവസ്തു വകുപ്പുകളുടെ അധിക ചുമതല കൂടി നല്‍കി. നേരത്തെ ഈ ചുമതല വഹിച്ചിരുന്ന ഗോപാലകൃഷ്ണന്‍ ഐഎഎസിനെ സ്ഥാനത്തുനിന്ന് ഒഴിവാക്കിയാണ് പുതിയ നിയമനം.
മറ്റ് പ്രധാന വകുപ്പുകളിലും ഉദ്യോഗസ്ഥര്‍ക്ക് പുതിയ ചുമതലകള്‍ നല്‍കിയിട്ടുണ്ട്. ശര്‍മ്മിള മേരി ജോസഫിന് കെടിഡിഎഫ്സിയുടെയും (KTDFC) എം.ജി. രാജമാണിക്യത്തിന് ഇന്‍ഫര്‍മേഷന്‍ കേരള മിഷന്റെയും അധിക ചുമതലകള്‍ നല്‍കി. ഭക്ഷ്യ സിവില്‍ സപ്ലൈസ് ഉപഭോക്തൃകാര്യ വകുപ്പ് സ്‌പെഷ്യല്‍ സെക്രട്ടറിയായ ഡി. ബാലമുരളിക്ക് കെഎംഎസ്സിഎല്‍ (KMSCL) മാനേജിംഗ് ഡയറക്ടറുടെ അധിക ചുമതല കൂടി നല്‍കിയിട്ടുണ്ട്. നേരത്തെ ഈ സ്ഥാനത്തേക്ക് നിയമിക്കപ്പെട്ട സുഭാഷ് ടി.വി. ചുമതല ഏറ്റെടുക്കാന്‍ വിസമ്മതിച്ചതിനെ തുടര്‍ന്നാണ് ഈ മാറ്റം.
പ്രധാന വകുപ്പുകളിലെ സ്‌പെഷ്യല്‍ സെക്രട്ടറി തലത്തിലും മാറ്റങ്ങളുണ്ട്. സുഹാസ് എസിനെ ഐ.ടി. വകുപ്പ് സ്‌പെഷ്യല്‍ സെക്രട്ടറിയായും, അബ്ദുല്‍ നാസര്‍ ബിയെ സഹകരണ വകുപ്പ് സ്‌പെഷ്യല്‍ സെക്രട്ടറിയായും നിയമിച്ചു. കെഎംഎസ്സിഎല്‍ എം.ഡി സ്ഥാനം നിരസിച്ച സുഭാഷ് ടി.വിയെ കൃഷി വകുപ്പ് സ്‌പെഷ്യല്‍ സെക്രട്ടറിയായാണ് മാറ്റി നിയമിച്ചിരിക്കുന്നത്. കൂടാതെ, അഫ്സാന പര്‍വീനെ മില്‍മ (MILMA) മാനേജിംഗ് ഡയറക്ടറായും സര്‍ക്കാര്‍ നിയമിച്ചു.
Comments
No comments yet. Be the first to comment!
Leave a Comment