തിരുവനന്തപുരം: എല്‍പിഎസ്ടി ഉദ്യോഗാര്‍ഥികളുടെ സമരത്തിനെതിരെ സര്‍ക്കാര്‍ സ്വീകരിക്കുന്ന നടപടികളില്‍ രൂക്ഷവിമര്‍ശനവുമായി സിപിഎം എംപി ഡോ. ജോണ്‍ ബ്രിട്ടാസ്. വി.ഡി. സതീശനും മന്ത്രിസഭയ്ക്കും ജനാധിപത്യ കേരളം ഒരിക്കലും മാപ്പുനല്‍കില്ലെന്ന് അദ്ദേഹം പറഞ്ഞു. പൊലീസിനെ ഉപയോഗിച്ച് സമരത്തെ അടിച്ചമര്‍ത്താനാണ് സര്‍ക്കാര്‍ ശ്രമിക്കുന്നതെന്നും സമരക്കാര്‍ക്കെതിരെ കള്ളക്കേസുകള്‍ ചുമത്തുകയാണെന്നും അദ്ദേഹം ആരോപിച്ചു.
എല്‍പിഎസ്ടി ഉദ്യോഗാര്‍ഥികളുടെ സമരപ്പന്തല്‍ പൊളിച്ചുമാറ്റിയതിന് പിന്നാലെ സമരകേന്ദ്രം സന്ദര്‍ശിച്ച് മാധ്യമങ്ങളോട് സംസാരിക്കുകയായിരുന്നു ജോണ്‍ ബ്രിട്ടാസ്. സമരപ്പന്തല്‍ കേരളത്തിന്റെ ജാഗ്രതയുടെ പ്രതീകമാണെന്നും ഉദ്യോഗാര്‍ഥികളെ ചര്‍ച്ചയ്ക്ക് വിളിക്കാന്‍ സര്‍ക്കാര്‍ തയ്യാറാകുന്നില്ലെന്നും അദ്ദേഹം കുറ്റപ്പെടുത്തി. സമരകേന്ദ്രത്തിന് സമീപം നിരവധി പ്രധാന വ്യക്തികളുണ്ടായിട്ടും ആരും സമരക്കാരെ കാണാനെത്തിയില്ലെന്നും അദ്ദേഹം പറഞ്ഞു.
പൊതുനടപ്പാതയ്ക്ക് തടസ്സമുണ്ടാക്കാതെയാണ് ഉദ്യോഗാര്‍ഥികള്‍ സമരം നടത്തിയിരുന്നത്. സമാധാനപരമായി നടന്ന സമരത്തെ ഇല്ലാതാക്കാനാണ് സര്‍ക്കാര്‍ ശ്രമിച്ചതെന്നും ഗാന്ധിയുടെയും നെഹ്‌റുവിന്റെയും അനുയായികളെന്ന് അവകാശപ്പെടുന്നവര്‍ ഇത്തരം നടപടികള്‍ സ്വീകരിക്കുന്നത് എന്തിനാണെന്നും ബ്രിട്ടാസ് ചോദിച്ചു.
കോണ്‍ഗ്രസ് ദേശീയ നേതൃത്വത്തിനെതിരെയും അദ്ദേഹം വിമര്‍ശനം ഉന്നയിച്ചു. കെ.സി. വേണുഗോപാലും രാഹുല്‍ ഗാന്ധിയും തങ്ങള്‍ ഭരിക്കുന്ന സംസ്ഥാനത്ത് എന്താണ് സംഭവിക്കുന്നതെന്ന് മനസ്സിലാക്കണം. ഇന്ത്യ സഖ്യം രാജ്യത്തുടനീളം വിവിധ സമരങ്ങളില്‍ പങ്കെടുക്കുമ്പോള്‍ കേരളത്തില്‍ ന്യായമായ സമരത്തെ യുഡിഎഫ് സര്‍ക്കാര്‍ അടിച്ചമര്‍ത്തുകയാണെന്നും അദ്ദേഹം ആരോപിച്ചു. വിഷയത്തില്‍ കോണ്‍ഗ്രസ് നേതൃത്വത്തിന്റെയും രാഹുല്‍ ഗാന്ധിയുടെയും കെ.സി. വേണുഗോപാലിന്റെയും നിലപാട് വ്യക്തമാക്കണമെന്നും ജോണ്‍ ബ്രിട്ടാസ് ആവശ്യപ്പെട്ടു.
Comments
No comments yet. Be the first to comment!
Leave a Comment