തിരുവനന്തപുരം: നെടുമ്പാശേരി വാഹനാപകടത്തില്‍ ആഭ്യന്തരമന്ത്രി ശക്തമായ നിലപാട് സ്വീകരിച്ചെങ്കിലും പൊലീസിന്റെ മനോഭാവത്തില്‍ മാറ്റമുണ്ടായില്ലെന്ന് പ്രതിപക്ഷ നേതാവ് പിണറായി വിജയന്‍. ചേരാനല്ലൂര്‍ വാഹനാപകടത്തിലും ഇതേ സമീപനമാണ് പ്രകടമായതെന്നും സമ്പന്നര്‍ക്കും സാധാരണക്കാര്‍ക്കും വ്യത്യസ്ത നീതിയാണോ നടപ്പാക്കുന്നതെന്ന ചോദ്യം ഗൗരവത്തോടെ കാണണമെന്നും അദ്ദേഹം നിയമസഭയില്‍ ആവശ്യപ്പെട്ടു.
സമ്പന്നര്‍ക്കും സ്വാധീനമുള്ളവര്‍ക്കും സാധാരണക്കാര്‍ക്കും രണ്ട് നീതിയില്ലെന്നാണ് സര്‍ക്കാര്‍ പറയുന്നത്. എന്നാല്‍, യാഥാര്‍ഥ്യത്തില്‍ അത്തരമൊരു സാഹചര്യം നിലനില്‍ക്കുന്നുണ്ടോയെന്ന് പരിശോധിക്കേണ്ടതുണ്ടെന്ന് പിണറായി പറഞ്ഞു.
ചേരാനല്ലൂര്‍ അപകടത്തില്‍ മരിച്ച ജയപാലകൃഷ്ണന്റെ മകള്‍ ഉയര്‍ത്തിയ ചോദ്യവും അദ്ദേഹം സഭയില്‍ പരാമര്‍ശിച്ചു. സമ്പന്നര്‍ക്കും സാധാരണക്കാര്‍ക്കും വ്യത്യസ്ത നീതിയാണോ എന്ന കുട്ടിയുടെ ചോദ്യം ഗൗരവതരമാണ്. പിതാവിന്റെ ചിതയിലെ തീ അണയുംമുമ്പ് ഇത്തരമൊരു ചോദ്യം ഉയരേണ്ടിവന്നത് സങ്കടകരവും അപമാനകരവുമാണെന്നും അദ്ദേഹം പറഞ്ഞു.
ആഭ്യന്തര മന്ത്രിയുടെ നിലപാടുപോലും പൊലീസ് അംഗീകരിക്കുന്നില്ലെന്ന സാഹചര്യമാണുള്ളതെന്നും പിണറായി ആരോപിച്ചു. ഇത്തരം സംഭവങ്ങള്‍ പൊലീസിലുള്ള പൊതുജനങ്ങളുടെ വിശ്വാസം നഷ്ടപ്പെടുത്തുന്ന പ്രതികരണങ്ങള്‍ക്ക് കാരണമാകുന്നുണ്ടെന്നും അദ്ദേഹം കൂട്ടിച്ചേര്‍ത്തു.
Comments
No comments yet. Be the first to comment!
Leave a Comment