തിരുവനന്തപുരം: ചേരാനെല്ലൂര്‍ സംഭവത്തില്‍ തുടക്കത്തില്‍ പൊലീസ് സ്വീകരിച്ച നിലപാട് ശരിയായിരുന്നില്ലെന്ന് ആഭ്യന്തരമന്ത്രി രമേശ് ചെന്നിത്തല. സംഭവത്തില്‍ നരഹത്യാക്കുറ്റം ചുമത്തേണ്ടതായിരുന്നുവെന്നും അതിന് തയ്യാറാകാതിരുന്നത് പൊലീസിന്റെ വീഴ്ചയാണെന്നും അദ്ദേഹം നിയമസഭയില്‍ വ്യക്തമാക്കി.
ചേരാനെല്ലൂരിലുണ്ടായത് അതീവ ദാരുണമായ സംഭവമാണെന്നും പ്രതിപക്ഷ നേതാവ് സഭയില്‍ ഉന്നയിച്ച വിഷയം ശരിയാണെന്നും മന്ത്രി പറഞ്ഞു. സംഭവത്തില്‍ അടിയന്തരമായി ഇടപെട്ട് ഡിജിപിയുമായി സംസാരിച്ചിരുന്നു. തുടര്‍ന്ന് നരഹത്യാക്കുറ്റം ചുമത്തി കേസെടുക്കുകയും പ്രതിയെ കസ്റ്റഡിയിലെടുത്ത് ജുവനൈല്‍ കോടതിയില്‍ ഹാജരാക്കുകയും ചെയ്തു.
എന്നാല്‍ കോടതിയില്‍ ഹാജരാക്കിയ ഉടന്‍ പ്രതിക്ക് ജാമ്യം അനുവദിച്ചത് ആശ്ചര്യകരമായിരുന്നുവെന്ന് ചെന്നിത്തല പറഞ്ഞു. ജാമ്യം റദ്ദാക്കുന്നതിനുള്ള നടപടികള്‍ സ്വീകരിക്കാന്‍ നിര്‍ദേശം നല്‍കിയിട്ടുണ്ടെന്നും അദ്ദേഹം വ്യക്തമാക്കി.
നിയമം എല്ലാവര്‍ക്കും ഒരുപോലെയാണെന്നും പാവപ്പെട്ടവനെന്നോ പണക്കാരനെന്നോ വ്യത്യാസമില്ലെന്നും മന്ത്രി പറഞ്ഞു. വാഹനം ഓടിച്ചത് പതിനേഴുകാരനാണെന്നും വാഹനം ജഡ്ജിയുടെ പേരിലാണെങ്കിലും നിയമപ്രകാരം കേസെടുക്കുമെന്നും അദ്ദേഹം കൂട്ടിച്ചേര്‍ത്തു.
സംസ്ഥാനത്ത് പൊലീസുകാരുടെ എണ്ണം വര്‍ധിപ്പിക്കേണ്ടത് അനിവാര്യമാണെന്നും ചെന്നിത്തല ചൂണ്ടിക്കാട്ടി. ജനസംഖ്യാ വര്‍ധനവിന് ആനുപാതികമായി പൊലീസിന്റെ അംഗബലം ഉയര്‍ത്തണം. പൊലീസിന് ജോലിഭാരം വര്‍ധിച്ചുവരികയാണെന്നും ക്രമസമാധാന പ്രശ്‌നങ്ങള്‍ ഫലപ്രദമായി കൈകാര്യം ചെയ്യാന്‍ കൂടുതല്‍ പൊലീസുകാരെ നിയമിക്കേണ്ടതുണ്ടെന്നും അദ്ദേഹം പറഞ്ഞു.
Comments
No comments yet. Be the first to comment!
Leave a Comment