തിരുവനന്തപുരം: ബംഗാള് ഉള്ക്കടലിലെ ന്യൂനമര്ദ്ദത്തിന്റെയും തമിഴ്നാടിന് മുകളിലുള്ള ചക്രവാതച്ചുഴിയുടെയും സ്വാധീനഫലമായി സംസ്ഥാനത്ത് സെപ്റ്റംബര് 23 മുതല് മഴ വീണ്ടും ശക്തമാകുമെന്ന് കാലാവസ്ഥാ നിരീക്ഷണ കേന്ദ്രം അറിയിച്ചു. സെപ്റ്റംബര് 25 വരെ കേരളത്തിലുടനീളം നേരിയതോ മിതമായതോ ആയ മഴയ്ക്ക് സാധ്യതയുണ്ട്.
ഇന്ന് സംസ്ഥാനത്ത് പ്രത്യേക അലേര്ട്ടുകള് ഒന്നും നിലവിലില്ലെങ്കിലും, ഒറ്റപ്പെട്ടയിടങ്ങളില് ഇടിമിന്നലോട് കൂടിയ മഴയ്ക്കും മണിക്കൂറില് 30 മുതല് 40 കിലോമീറ്റര് വരെ വേഗതയില് വീശിയടിക്കുന്ന കാറ്റിനും സാധ്യതയുണ്ട്. നാളെ (സെപ്റ്റംബര് 23) തെക്കന് ജില്ലകളായ തിരുവനന്തപുരം, കൊല്ലം, പത്തനംതിട്ട എന്നിവിടങ്ങളിലും, സെപ്റ്റംബര് 24-ന് വടക്കന് ജില്ലകളായ മലപ്പുറം, കോഴിക്കോട്, വയനാട്, കണ്ണൂര്, കാസര്കോട് എന്നിവിടങ്ങളിലും യെല്ലോ അലേര്ട്ട് പ്രഖ്യാപിച്ചു.
മധ്യ പടിഞ്ഞാറന് - മധ്യകിഴക്കന് ബംഗാള് ഉള്ക്കടലില് രൂപപ്പെട്ട ശക്തി കൂടിയ ന്യൂനമര്ദ്ദം അടുത്ത ദിവസങ്ങളില് തീവ്ര ന്യൂനമര്ദ്ദമായി മാറി സെപ്റ്റംബര് 23-ഓടെ വടക്കന് ആന്ധ്രാപ്രദേശ് - തെക്കന് ഒഡീഷ തീരങ്ങള്ക്ക് സമീപമെത്താന് സാധ്യതയുണ്ട്. തമിഴ്നാടിന് മുകളിലുള്ള ചക്രവാതച്ചുഴിയും കേരളത്തിലൂടെ കടന്നുപോകുന്ന ന്യൂനമര്ദ്ദ പാത്തിയും മഴയുടെ ശക്തി വര്ധിപ്പിക്കുന്നു.
അതേസമയം, മഴ വീണ്ടും എത്തുന്നുണ്ടെങ്കിലും സംസ്ഥാനത്തെ വൈദ്യുതി നിയന്ത്രണത്തില് നിലവില് മാറ്റമുണ്ടാകില്ല. ഉപഭോഗം ഉയര്ന്ന നിരക്കില് തുടരുന്നതിനാല് ഇന്നും വൈദ്യുതി നിയന്ത്രണം തുടര്ന്നേക്കാം. ദീര്ഘകാല കരാര് വഴിയും സ്വാപ് വഴിയും ലഭിക്കേണ്ട വൈദ്യുതി മുടങ്ങിയതാണ് നിലവിലെ പ്രതിസന്ധിക്ക് കാരണമെന്ന് കെഎസ്ഇബി അറിയിച്ചു.
Comments
No comments yet. Be the first to comment!
Leave a Comment