ബ്ലാസ്റ്റേഴ്സ് - ജിസിഡിഎ തര്‍ക്കം തീര്‍ന്നു; കൊച്ചിയില്‍ നാളെ പന്ത് ഉരുളും

കൊച്ചി:  കൊച്ചി കലൂര്‍ സ്റ്റേഡിയത്തില്‍ നാളെ നടക്കാനിരിക്കുന്ന കേരള ബ്ലാസ്റ്റേഴ്സിന്റെ ഹോം മത്സരവുമായി ബന്ധപ്പെട്ട അനിശ്ചിതത്വങ്ങള്‍ക്ക് പരിഹാരമായി. സ്റ്റേഡിയം വാടകയിനത്തില്‍ ജിസിഡിഎയ്ക്ക് നല്‍കാനുള്ള തുകയുടെ ആദ്യ ഗഡുവായ 28 ലക്ഷം രൂപ ഒരാഴ്ചയ്ക്കുള്ളില്‍ നല്‍കാമെന്ന് ബ്ലാസ്റ്റേഴ്സ് അധികൃതര്‍ ഉറപ്പുനല്‍കിയതോടെയാണ് പ്രതിസന്ധി നീങ്ങിയത്. ഓരോ മത്സരത്തിനും 4.2 ലക്ഷം രൂപ വാടകയായി നല്‍കണമെന്ന ജിസിഡിഎയുടെ നിര്‍ദ്ദേശം ക്ലബ്ബ് ഔദ്യോഗികമായി അംഗീകരിച്ചു. ഇതോടെ നാളെ രാത്രി 7:30-ന് മുംബൈ സിറ്റിക്കെതിരെ നിശ്ചയിച്ചിരുന്ന മത്സരം തടസ്സമില്ലാതെ നടക്കും.

മത്സരത്തിന് തൊട്ടുമുന്‍പുള്ള ദിവസങ്ങളില്‍ ജിസിഡിഎ പെട്ടെന്ന് വാടക തുക വര്‍ദ്ധിപ്പിച്ചത് വലിയ വിവാദങ്ങള്‍ക്ക് വഴിതെളിച്ചിരുന്നു. ഇതില്‍ അസ്വാഭാവികതയുണ്ടെന്ന് ബ്ലാസ്റ്റേഴ്സിന്റെ ഔദ്യോഗിക ഫാന്‍ ഗ്രൂപ്പായ മഞ്ഞപ്പട ആരോപിച്ചു. വിഷയത്തില്‍ കായികമന്ത്രി ഇടപെടാതിരുന്നതും സ്റ്റേഡിയം നവീകരണവുമായി ബന്ധപ്പെട്ട കാര്യങ്ങളും സംശയാസ്പദമാണെന്ന് ആരാധക കൂട്ടായ്മ പ്രതിനിധികള്‍ വ്യക്തമാക്കി. എന്നാല്‍ ക്ലബ്ബ് സിഇഒ അഭിക് ചാറ്റര്‍ജി ജിസിഡിഎയുമായി നടത്തിയ ചര്‍ച്ചകള്‍ക്കൊടുവില്‍ അനുകൂല തീരുമാനമുണ്ടായത് ആരാധകര്‍ക്ക് വലിയ ആശ്വാസമായിരിക്കുകയാണ്.