പത്തനംതിട്ട: ഫോണ്‍ കോളുകള്‍ സ്വീകരിക്കാത്ത വാട്ടര്‍ അതോറിറ്റി ഉദ്യോഗസ്ഥര്‍ക്കെതിരെ രൂക്ഷ വിമര്‍ശനവുമായി മന്ത്രി മോന്‍സ് ജോസഫ്. പത്തനംതിട്ടയില്‍ നടന്ന ശബരിമല അവലോകന യോഗത്തിനിടെയാണ് മന്ത്രി ഉദ്യോഗസ്ഥരെ ശകാരിച്ചത്. വാട്ടര്‍ അതോറിറ്റി ജീവനക്കാര്‍ ഫോണ്‍ എടുക്കുന്നില്ലെന്ന പരാതി എംഎല്‍എമാര്‍ ഉള്‍പ്പെടെയുള്ളവര്‍ ഉന്നയിച്ചതോടെയാണ് മന്ത്രിയുടെ പ്രതികരണം.
വാട്ടര്‍ അതോറിറ്റിയിലെ ഉന്നത ഉദ്യോഗസ്ഥര്‍ മുതല്‍ താഴെത്തട്ടിലുള്ള ജീവനക്കാര്‍ വരെ നിര്‍ബന്ധമായും ഫോണ്‍ കോളുകള്‍ സ്വീകരിക്കണമെന്ന് മന്ത്രി പറഞ്ഞു. ഏതെങ്കിലും സാഹചര്യത്തില്‍ ഫോണ്‍ എടുക്കാന്‍ കഴിയാതെ വന്നാല്‍ തിരിച്ചുവിളിച്ച് മറുപടി നല്‍കണം. ഇക്കാര്യത്തില്‍ യാതൊരു വിട്ടുവീഴ്ചയുമുണ്ടാകില്ലെന്നും അദ്ദേഹം വ്യക്തമാക്കി.
ഇത് ഒറ്റപ്പെട്ട സംഭവമല്ലെന്നും കേരളമൊട്ടാകെ സമാനമായ അവസ്ഥയാണെന്നും മന്ത്രി വിമര്‍ശിച്ചു. ജനങ്ങളോട് ഉത്തരവാദിത്തത്തോടെയും നീതിയോടെയും പെരുമാറേണ്ട ജീവനക്കാരില്‍ ഭൂരിഭാഗവും ഉത്തരവാദിത്തമില്ലാത്ത രീതിയിലാണ് പ്രവര്‍ത്തിക്കുന്നതെന്നാണ് മന്ത്രിയുടെ ആരോപണം.
യൂണിയനുകളുടെ സംരക്ഷണത്തിന്റെ മറവിലാണ് ഇത്തരം പ്രവൃത്തികള്‍ നടക്കുന്നതെങ്കില്‍ ശക്തമായ ഇടപെടലുണ്ടാകുമെന്നും മന്ത്രി മുന്നറിയിപ്പ് നല്‍കി. ശബരിമല തീര്‍ത്ഥാടനവുമായി ബന്ധപ്പെട്ട ഒരുക്കങ്ങള്‍ വിലയിരുത്തുന്നതിനിടെയാണ് വാട്ടര്‍ അതോറിറ്റി ഉദ്യോഗസ്ഥരുടെ പ്രവര്‍ത്തനരീതിക്കെതിരെ മന്ത്രി കടുത്ത നിലപാട് സ്വീകരിച്ചത്.
Comments
No comments yet. Be the first to comment!
Leave a Comment