തിരുവനന്തപുരം: കേരളത്തിന് അനുവദിച്ച അധിക കേന്ദ്ര വൈദ്യുതി വിഹിതത്തിന്റെ കാലാവധി ഡിസംബര്‍ 31 വരെ നീട്ടി കേന്ദ്ര ഊര്‍ജ മന്ത്രാലയം. 150 മെഗാവാട്ട് വൈദ്യുതിയാണ് സംസ്ഥാനത്തിന് അധികമായി ലഭിക്കുക. നവംബര്‍ 15ന് അവസാനിക്കേണ്ടിയിരുന്ന വിഹിതം കേരളത്തിന്റെ അഭ്യര്‍ത്ഥന പരിഗണിച്ചാണ് നീട്ടിനല്‍കിയത്. സെപ്റ്റംബറിലുണ്ടായ വൈദ്യുതി പ്രതിസന്ധിയെ തുടര്‍ന്നാണ് കേന്ദ്രം അധിക വൈദ്യുതി അനുവദിച്ചത്.
അതേസമയം, സംസ്ഥാനത്തെ വൈദ്യുതി വാങ്ങല്‍ കരാറുകളുമായി ബന്ധപ്പെട്ട വിവാദങ്ങളില്‍ വൈദ്യുതി വകുപ്പ് മന്ത്രി സണ്ണി ജോസഫിന് കടുത്ത അതൃപ്തി. കെഎസ്ഇബി മുന്‍ ചെയര്‍മാന്‍ എം.ജി. രാജമാണിക്യത്തെ മാറ്റിയതും മഹാരാഷ്ട്രയിലെ സിന്നാര്‍ വൈദ്യുതി നിലയവുമായി ബന്ധപ്പെട്ട കരാറും മന്ത്രിയെ അറിയിക്കാതെയാണ് തീരുമാനിച്ചതെന്നാണ് പ്രധാന ആക്ഷേപം. വൈദ്യുതി പ്രതിസന്ധി സംബന്ധിച്ച റിപ്പോര്‍ട്ടില്‍ അന്വേഷണം പ്രഖ്യാപിച്ചതിലും മന്ത്രി നീരസം പ്രകടിപ്പിച്ചിട്ടുണ്ട്.
ഹിമാചലില്‍ നിന്നും ജിഎന്‍എ പ്രൈവറ്റ് ലിമിറ്റഡില്‍ നിന്നും വൈദ്യുതി വാങ്ങുന്നതുമായി ബന്ധപ്പെട്ട് കഴിഞ്ഞ രണ്ടാഴ്ചയായി സംസ്ഥാനത്ത് വിവാദങ്ങള്‍ ശക്തമായിരുന്നു. ഇരു സ്ഥാപനങ്ങളില്‍ നിന്നും വൈദ്യുതി വാങ്ങേണ്ടതില്ലെന്ന തീരുമാനം ഇന്നലെ മുഖ്യമന്ത്രി വി.ഡി. സതീശന്‍ പ്രഖ്യാപിച്ചിരുന്നു. ഇതോടെ വിവാദങ്ങള്‍ക്ക് വിരാമമാകുമെന്നായിരുന്നു പ്രതീക്ഷ.
എന്നാല്‍ മുഖ്യമന്ത്രിയുടെ പ്രഖ്യാപനത്തിന് പിന്നാലെ മാധ്യമങ്ങളെ കണ്ട സണ്ണി ജോസഫ് തന്റെ അതൃപ്തി പരസ്യമായി പ്രകടിപ്പിച്ചു. മഹാരാഷ്ട്രയിലെ സിന്നാര്‍ താപവൈദ്യുതി നിലയത്തില്‍ നിന്ന് വൈദ്യുതി വാങ്ങാനുള്ള തീരുമാനം തന്നെ അറിയിച്ചിരുന്നില്ലെന്നും ഇത്തരം കാര്യങ്ങളെല്ലാം മാധ്യമങ്ങളിലൂടെയാണ് അറിഞ്ഞതെന്നുമാണ് മന്ത്രിയുടെ പ്രതികരണം. വൈദ്യുതി വകുപ്പുമായി ബന്ധപ്പെട്ട നിര്‍ണായക തീരുമാനങ്ങള്‍ അറിയിക്കാത്തതിലുള്ള അതൃപ്തിയാണ് ഇതിലൂടെ പുറത്തുവന്നത്.
Comments
No comments yet. Be the first to comment!
Leave a Comment