തിരുവനന്തപുരം: സംസ്ഥാനത്തെ ഐഎഎസ് തലപ്പത്തിലെ മാറ്റങ്ങളില്‍ പ്രതികരണവുമായി മന്ത്രി കെ. മുരളീധരന്‍. ഭരണസംവിധാനത്തില്‍ ഇത്തരം മാറ്റങ്ങള്‍ സ്വാഭാവികമാണെന്നും സാധാരണ ട്രാന്‍സ്ഫര്‍ നടപടികളുടെ ഭാഗമായാണ് മാറ്റങ്ങള്‍ നടന്നതെന്നും മന്ത്രി പറഞ്ഞു. ഐഎഎസ് അസോസിയേഷനുമായി കൂടിയാലോചന നടത്താറില്ലെന്നും ഇക്കാര്യത്തില്‍ അസ്വാഭാവികമായി ഒന്നുമില്ലെന്നും അദ്ദേഹം മാധ്യമങ്ങളോട് വ്യക്തമാക്കി.
ശബരിമല മണ്ഡലകാലവുമായി ബന്ധപ്പെട്ട് അരവണയുടെ കരുതല്‍ ശേഖരം ഉറപ്പാക്കാന്‍ സര്‍ക്കാര്‍ ചെയ്യേണ്ട നടപടികളെല്ലാം സ്വീകരിച്ചിട്ടുണ്ട്. ഇനി എന്തെങ്കിലും പ്രശ്‌നങ്ങളുണ്ടായാല്‍ അതിന്റെ ഉത്തരവാദിത്വം തിരുവിതാംകൂര്‍ ദേവസ്വം ബോര്‍ഡിനായിരിക്കുമെന്നും മന്ത്രി പറഞ്ഞു. റോഡ് ഉള്‍പ്പെടെയുള്ള അടിസ്ഥാന സൗകര്യങ്ങള്‍ നവീകരിച്ചിട്ടുണ്ട്.
നിപ പ്രതിരോധത്തിനായി ഉപയോഗിച്ച റെംഡെസിവിര്‍ മരുന്നുമായി ബന്ധപ്പെട്ട വിവാദത്തില്‍ അന്വേഷണം പുരോഗമിക്കുകയാണ്. കെഎംഎസ്സിഎല്ലിന്റെ പുതിയ സെക്രട്ടറിയുടെ നേതൃത്വത്തില്‍ ബോര്‍ഡ് യോഗം ഉടന്‍ ചേരും. ഡയറക്ടറെയും നിയമിച്ചിട്ടുണ്ട്. നടപടികളെല്ലാം സമയബന്ധിതമായി പൂര്‍ത്തിയാകുമെന്നും പഴയ സെക്രട്ടറിക്ക് പകരം പുതിയ സെക്രട്ടറി ചുമതലയേറ്റത് സാധാരണ നടപടിക്രമമാണെന്നും മുരളീധരന്‍ വ്യക്തമാക്കി.
ആരോഗ്യവകുപ്പില്‍ പ്രഖ്യാപിച്ച അന്വേഷണങ്ങള്‍ അതത് വഴിക്ക് മുന്നോട്ടുപോകും. എന്‍എച്ച്എം കരാര്‍ ജീവനക്കാരെ പിരിച്ചുവിട്ടിട്ടില്ലെന്നും അവരുടെ കരാര്‍ കാലാവധി അവസാനിക്കുകയായിരുന്നുവെന്നും മന്ത്രി വിശദീകരിച്ചു. ന്യായമായ ആവശ്യങ്ങളുള്ള ജീവനക്കാരുടെ കാര്യങ്ങള്‍ പരിഗണിക്കും. കരാര്‍ ജീവനക്കാരുടെ വിഷയങ്ങള്‍ പകര്‍ച്ചവ്യാധി പ്രതിരോധ പ്രവര്‍ത്തനങ്ങള്‍ ഉള്‍പ്പെടെയുള്ളവയെ ബാധിക്കില്ലെന്നും അദ്ദേഹം കൂട്ടിച്ചേര്‍ത്തു.
Comments
No comments yet. Be the first to comment!
Leave a Comment