ശബരിമല നെയ്യ് ക്രമക്കേട്: കരാറുകാരൻ S.S ബിനു അറസ്റ്റിൽ; ദേവസ്വം ബോർഡിന് രണ്ടരക്കോടിയുടെ നഷ്ടം

തിരുവനന്തപുരം: ശബരിമലയിലേക്ക് എത്തിക്കേണ്ട മിൽമ നെയ്യ് മറിച്ചുവിറ്റ കേസിൽ ട്രാൻസ്‌പോർട്ട് കരാറുകാരനായ എസ്.എസ്. ബിനു അറസ്റ്റിൽ. 11,000 ലിറ്റർ നെയ്യുമായി ബന്ധപ്പെട്ട ഇൻവോയ്‌സുകൾ വ്യാജമായി തയ്യാറാക്കി നെയ്യ് മറ്റ് സ്ഥാപനങ്ങൾക്ക് വിറ്റുവെന്നാണ് അന്വേഷണസംഘത്തിന്റെ കണ്ടെത്തൽ. കേസിൽ അറസ്റ്റിലായ ബിനുവിനെ കൊല്ലം കോടതിയിൽ ഹാജരാക്കും.

ഇന്നലെ രാത്രിയോടെയാണ് ബിനുവിനെ അറസ്റ്റ് ചെയ്തത്. ശബരിമല സന്നിധാനത്തേക്ക് വിതരണം ചെയ്യേണ്ട മിൽമ നെയ്യ് വഴിതിരിച്ചുവിട്ട് വിൽപ്പന നടത്തിയെന്നാണ് കേസ്. തമിഴ്‌നാട്ടിലെ വെങ്കിടേശ്വര ട്രേഡേഴ്‌സ്, ലിയോ ട്രേഡേഴ്‌സ് എന്നീ സ്ഥാപനങ്ങൾക്കാണ് നെയ്യ് മറിച്ചുവിറ്റതെന്നാണ് അന്വേഷണത്തിൽ കണ്ടെത്തിയത്.

11,000 ലിറ്റർ നെയ്യുമായി ബന്ധപ്പെട്ട ഇൻവോയ്‌സുകൾ വ്യാജമായി തയ്യാറാക്കിയാണ് ക്രമക്കേട് നടത്തിയതെന്നാണ് അന്വേഷണസംഘത്തിന്റെ കണ്ടെത്തൽ. നെയ്യ് മറിച്ചുവിറ്റതിലൂടെ പ്രതിക്ക് അഞ്ച് ലക്ഷം രൂപയുടെ സാമ്പത്തിക നേട്ടമുണ്ടായതായും അന്വേഷണസംഘം വ്യക്തമാക്കുന്നു.

അതേസമയം, ഇടപാടിലൂടെ തിരുവിതാംകൂർ ദേവസ്വം ബോർഡിന് ഏകദേശം രണ്ടരക്കോടി രൂപയുടെ നഷ്ടമുണ്ടായെന്നാണ് കണക്ക്. നെയ്യ് വിതരണത്തിലെ ക്രമക്കേടിന്റെ വ്യാപ്തിയും ഇടപാടിൽ ഉൾപ്പെട്ട മറ്റ് വ്യക്തികളുടെ പങ്കും സംബന്ധിച്ച് കൂടുതൽ അന്വേഷണം തുടരുകയാണ്.

അറസ്റ്റിലായ എസ്.എസ്. ബിനുവിനെ കൊല്ലം കോടതിയിൽ ഹാജരാക്കാനാണ് അന്വേഷണസംഘത്തിന്റെ തീരുമാനം. നെയ്യ് വിതരണവുമായി ബന്ധപ്പെട്ട രേഖകൾ, വ്യാജ ഇൻവോയ്‌സുകൾ, മറ്റ് സാമ്പത്തിക ഇടപാടുകൾ എന്നിവ കേന്ദ്രീകരിച്ചായിരിക്കും തുടർനടപടികൾ.