കോഴിക്കോട്: കോഴിക്കോട് മെഡിക്കല്‍ കോളേജ് ആശുപത്രിയില്‍ വീണ്ടും ചികിത്സാപിഴവ് മൂലമുള്ള മരണം റിപ്പോര്‍ട്ട് ചെയ്തതായി പരാതി. ഗര്‍ഭപാത്രം നീക്കം ചെയ്യാനായി ശസ്ത്രക്രിയയ്ക്ക് വിധേയയായ വടകര സ്വദേശിനി പി. തങ്കമണി (60) ആണ് മരണപ്പെട്ടത്. ഡോക്ടര്‍മാരുടെ ഭാഗത്തുനിന്നുണ്ടായ ഗുരുതര വീഴ്ചയാണ് മരണത്തിന് കാരണമായതെന്ന് ആരോപിച്ച് ബന്ധുക്കള്‍ നല്‍കിയ പരാതിയില്‍ മെഡിക്കല്‍ കോളേജ് പോലീസ് കേസെടുത്ത് അന്വേഷണം ആരംഭിച്ചു.
ഈ മാസം അഞ്ചാം തീയതിയാണ് ശസ്ത്രക്രിയയ്ക്കായി തങ്കമണിയെ മെഡിക്കല്‍ കോളേജ് ആശുപത്രിയില്‍ പ്രവേശിപ്പിച്ചത്. എട്ടാം തീയതി ശസ്ത്രക്രിയ പൂര്‍ത്തിയാക്കി ഒന്‍പതിന് വാര്‍ഡിലേക്ക് മാറ്റി. എന്നാല്‍ പത്താം തീയതിയോടെ രോഗി രക്തം ഛര്‍ദ്ദിക്കുകയും ആരോഗ്യാവസ്ഥ വഷളാവുകയും ചെയ്തു. തുടര്‍ന്ന് 11-ാം തീയതി അടിയന്തരമായി രണ്ടാമതും ശസ്ത്രക്രിയ നടത്തിയെങ്കിലും 12-ന് മരണം സംഭവിക്കുകയായിരുന്നു.
ആദ്യ ശസ്ത്രക്രിയയ്ക്കിടെ ചെറുകുടലില്‍ ചെറിയ രീതിയില്‍ മുറിവേറ്റതായി ഡോക്ടര്‍മാര്‍ തന്നെ സമ്മതിച്ചിട്ടുണ്ടെന്ന് കുടുംബാംഗങ്ങള്‍ വ്യക്തമാക്കി. ഈ മുറിവും തുടര്‍ന്നുണ്ടായ അണുബാധയുമാണ് മരണത്തിലേക്ക് നയിച്ചതെന്നാണ് ബന്ധുക്കളുടെ പ്രധാന ആരോപണം. അതേസമയം, സംഭവത്തില്‍ ആശുപത്രി അധികൃതരുടെ ഭാഗത്തുനിന്നുള്ള ഔദ്യോഗിക വിശദീകരണം ഇതുവരെ ലഭ്യമായിട്ടില്ല.
Comments
No comments yet. Be the first to comment!
Leave a Comment