ഡല്ഹി: പതിനെട്ടാമത് ബ്രിക്സ് ഉച്ചകോടി വിജയകരമായിരുന്നുവെന്നും ഇന്ത്യയിലുള്ള ലോകരാജ്യങ്ങളുടെ വിശ്വാസം വര്ധിച്ചുവെന്നും പ്രധാനമന്ത്രി നരേന്ദ്ര മോദി. സെമികോണ് ഇന്ത്യ 2026ന്റെ ഉദ്ഘാടന ചടങ്ങില് സംസാരിക്കുകയായിരുന്നു അദ്ദേഹം. എല്ലാവരുടെയും പിന്തുണയോടെ ന്യൂഡല്ഹി പ്രഖ്യാപനം സമവായത്തോടെ അംഗീകരിക്കപ്പെട്ടത് ഇന്ത്യയുടെ വര്ധിച്ചുവരുന്ന ആഗോള വിശ്വാസ്യതയുടെ തെളിവാണെന്നും മോദി പറഞ്ഞു.
പശ്ചിമേഷ്യന് സംഘര്ഷത്തിന്റെ പശ്ചാത്തലത്തില് ഇറാനും യുഎഇയും തമ്മില് നിലനിന്നിരുന്ന ഭിന്നതകള്ക്കിടയിലും ബ്രിക്സ് രാജ്യങ്ങള് സംയുക്ത പ്രഖ്യാപനത്തില് സമവായത്തിലെത്തിയതിനെക്കുറിച്ചാണ് പ്രധാനമന്ത്രി പരാമര്ശിച്ചത്. സെപ്റ്റംബര് 12, 13 തീയതികളിലായിരുന്നു ന്യൂഡല്ഹിയില് 18-ാമത് ബ്രിക്സ് ഉച്ചകോടി നടന്നത്.
ആഗോളതലത്തിലെ വെല്ലുവിളികള്ക്കിടയിലും ഇന്ത്യന് സമ്പദ്വ്യവസ്ഥ ശക്തമായ വളര്ച്ച തുടരുകയാണെന്നും ഏറ്റവും പുതിയ കണക്കുകളില് 7.8 ശതമാനം ത്രൈമാസ വളര്ച്ച രേഖപ്പെടുത്തിയെന്നും മോദി പറഞ്ഞു.
ഇന്ത്യയുടെ സെമികണ്ടക്ടര് മേഖലയും അതിവേഗം വളരുകയാണെന്ന് പ്രധാനമന്ത്രി ചൂണ്ടിക്കാട്ടി. മൊഹാലിയിലും സൂറത്തിലും രണ്ട് സെമികണ്ടക്ടര് പ്ലാന്റുകളില് വാണിജ്യ ഉല്പ്പാദനം ആരംഭിച്ചതായി അദ്ദേഹം വ്യക്തമാക്കി. ഇന്ത്യ സെമികണ്ടക്ടര് മിഷന്റെ രണ്ടാം ഘട്ടത്തിലേക്ക് കടന്നതായും ഇത് നൂതനാശയങ്ങള്ക്കും നിക്ഷേപങ്ങള്ക്കും വളര്ച്ചയ്ക്കും പുതിയ അവസരങ്ങള് തുറക്കുമെന്നും മോദി പറഞ്ഞു.
ചിപ്പ് ഡിസൈന് മുതല് നിര്മാണം, പരിശോധന, പാക്കേജിങ് എന്നിവ ഉള്പ്പെടുന്ന സമഗ്രമായ സെമികണ്ടക്ടര് പരിസ്ഥിതി സംവിധാനം ഇന്ത്യയില് വികസിപ്പിക്കുകയാണ് ലക്ഷ്യമെന്നും അദ്ദേഹം വ്യക്തമാക്കി. ആത്മനിര്ഭര് ഭാരതും വികസിത് ഭാരതും കെട്ടിപ്പടുക്കുന്നതിന് ഇന്ത്യയുടെ നൂതനാശയ പാരമ്പര്യവും 21-ാം നൂറ്റാണ്ടിലെ സാങ്കേതികവിദ്യയും ഒത്തുചേരുകയാണെന്നും പ്രധാനമന്ത്രി കൂട്ടിച്ചേര്ത്തു.
Comments
No comments yet. Be the first to comment!
Leave a Comment