തൃശൂര്: കേരളത്തിലെ യുഡിഎഫ് സര്ക്കാരിനെ പ്രശംസിച്ച് കേന്ദ്രമന്ത്രി സുരേഷ് ഗോപി. മുന്കാലങ്ങളെ അപേക്ഷിച്ച് സംസ്ഥാന സര്ക്കാരില്നിന്ന് കൂടുതല് സഹായം ലഭിക്കുന്നുണ്ടെന്ന് അദ്ദേഹം പറഞ്ഞു. കഴിഞ്ഞ പത്തുവര്ഷമായി സര്ക്കാരില്നിന്ന് തനിക്ക് ആവശ്യമായ പിന്തുണ ലഭിച്ചിരുന്നില്ലെന്നും ഇപ്പോള് മുഖ്യമന്ത്രി വി.ഡി. സതീശന് അടക്കമുള്ളവരെ ഏത് കാര്യത്തിനും സമീപിക്കാമെന്നും സുരേഷ് ഗോപി വ്യക്തമാക്കി.
കേന്ദ്ര പദ്ധതികള് സംസ്ഥാനത്തേക്ക് എത്തിക്കുന്നതിന് സംസ്ഥാന സര്ക്കാരിന്റെ സഹകരണം അനുകൂല സാഹചര്യമൊരുക്കുമെന്നും അദ്ദേഹം കൂട്ടിച്ചേര്ത്തു.
റിപ്പോര്ട്ടര് ടിവിയിലെ പൊലീസ് റെയ്ഡുമായി ബന്ധപ്പെട്ടും സുരേഷ് ഗോപി പ്രതികരിച്ചു. റെയ്ഡ് സ്വാഭാവിക നടപടിയാണെന്നാണ് അദ്ദേഹത്തിന്റെ നിലപാട്. പരിശോധനയ്ക്കിടെ ഫോണുകള് പിടിച്ചുവയ്ക്കുന്നത് സാധാരണ നടപടിയാണെന്നും നികുതി നല്കുന്ന പൗരന് ഇല്ലാത്ത എന്താണ് മാധ്യമപ്രവര്ത്തകര്ക്കുള്ളതെന്നും അദ്ദേഹം ചോദിച്ചു.
സാധാരണക്കാരന്റെ വീടിനുള്ളിലേക്ക് പൊലീസ് പ്രവേശിച്ച് പരിശോധന നടത്തുമ്പോഴും ആരും പ്രതികരിക്കാറില്ലെന്ന് സുരേഷ് ഗോപി പറഞ്ഞു. ഉദ്യോഗസ്ഥര് പരിശോധന നടത്തുമ്പോള് ഫോണുകള് കൈവശപ്പെടുത്തുന്നത് എല്ലായിടത്തും നടക്കുന്ന നടപടിയാണെന്നും അദ്ദേഹം വ്യക്തമാക്കി.
ഏത് വമ്പന് മുതലാളിയുടെ വീട്ടില് പരിശോധന നടത്തിയാലും ഫോണ് പിടിച്ചുവയ്ക്കുമെന്നും എന്തെങ്കിലും ഒളിപ്പിച്ചുവെച്ചിട്ടുണ്ടെങ്കില് അത് കണ്ടെത്താന് അന്വേഷണ ഉദ്യോഗസ്ഥര്ക്ക് കഴിയുമെന്നും സുരേഷ് ഗോപി പറഞ്ഞു. ഇത്തരം നടപടികള് ഏതെങ്കിലും പ്രത്യേക രാഷ്ട്രീയ നേതാവിന്റെ കാലത്ത് ആരംഭിച്ചതല്ലെന്നും സംവിധാനം നിലവില് വന്ന കാലം മുതല് ഇതേ രീതിയിലാണ് പ്രവര്ത്തിക്കുന്നതെന്നും കേന്ദ്രമന്ത്രി കൂട്ടിച്ചേര്ത്തു.
Comments
No comments yet. Be the first to comment!
Leave a Comment