കണ്ണൂര്: എ.ഡി.എം നവീന് ബാബുവിന്റെ മരണത്തില് പ്രതിയായ കണ്ണൂര് മുന് ജില്ലാ പഞ്ചായത്ത് പ്രസിഡന്റ് പി.പി. ദിവ്യ ജയിലിലേക്ക്. കേസില് ദിവ്യയുടെ അറസ്റ്റ് രേഖപ്പെടുത്തിയ ശേഷം വൈദ്യപരിശോധന നടത്തി മജിസ്ട്രേറ്റിന് മുന്നില് ഹാജരാക്കി റിമാന്ഡ് ചെയ്തു. രണ്ടാഴ്ചത്തേക്കാണ് റിമാന്ഡ് ചെയ്തിരിക്കുന്നത്. പള്ളിക്കുന്നിലെ വനിത ജയിലിലായിരിക്കും ദിവ്യയെ പാര്പ്പിക്കുക.
അടുത്ത മാസം 12-ാം തിയതി വരെയാണ് റിമാന്ഡ് കാലാവധി. കനത്ത പോലീസ് സുരക്ഷയോടെയാണ് ദിവ്യയെ തളിപ്പറമ്പ് മജിസ്ട്രേറ്റിന്റെ വീട്ടില് ഹാജരാക്കിയത്. മജിസ്ട്രേറ്റിന്റെ വീടിന് മുന്നില് യൂത്ത് കോണ്ഗ്രസ്, യുവ മോര്ച്ച പ്രവര്ത്തകര് കരിങ്കൊടിയുമായെത്തി പ്രതിഷേധിച്ചു. തുടര്ന്ന് പ്രതിഷേധക്കാരും പോലീസും തമ്മില് ഉന്തും തള്ളുമുണ്ടായി. ബുധനാഴ്ച ദിവ്യ തലശ്ശേരി സെഷന്സ് കോടതിയില് ജാമ്യ ഹര്ജി നല്കും.
തലശേരി പ്രിന്സിപ്പല് സെഷന്സ് കോടതി മുന്കൂര് ജാമ്യ ഹര്ജി തള്ളിയതിന് പിന്നാലെയാണ് പി.പി. ദിവ്യ കീഴടങ്ങിയത്. മുന്കൂര് ജാമ്യം നിഷേധിച്ചുകൊണ്ടുള്ള സെഷന്സ് കോടതി ഉത്തരവില് ദിവ്യയ്ക്കെതിരെ ഗൗരവതരമായ കണ്ടെത്തലുകളാണ് ഉള്ളത്. ക്ഷണിച്ചിട്ടാണ് നവീന് ബാബുവിന്റെ യാത്രയയപ്പ് യോഗത്തില് എത്തിയതെന്ന ദിവ്യയുടെ വാദവും കോടതി തള്ളി. കരുതിക്കൂട്ടി വീഡിയോ ചിത്രീകരിക്കാന് പദ്ധതിയിട്ടതും പ്രചരിപ്പിച്ചതും നവീനെ മേലുദ്യോഗസ്ഥര്ക്കും സഹപ്രവര്ത്തകര്ക്കും മുന്പില് അപമാനിക്കാനുള്ള ഉദ്ദേശ്യത്തോടെയാണെന്ന് കോടതി കണ്ടെത്തി.
ദിവ്യയുടെ പ്രവൃത്തി ദുരുദ്ദേശപരമാണ്. അതിനാലാണ് നവീന്റെ ജന്മദേശമായ പത്തനംതിട്ടയിലും വീഡിയോ പ്രചരിപ്പിക്കപ്പെട്ടത്. കേസ് നിലവിലുണ്ടെന്ന് അംഗീകരിച്ചാലും കസ്റ്റഡിയില് ചോദ്യം ചെയ്യേണ്ട ആവശ്യമില്ലെന്ന ദിവ്യയുടെ വാദവും കോടതി തള്ളി. പ്രതി രാഷ്ട്രീയ സ്വാധീനം ഉപയോഗിച്ച് സാക്ഷികളെ സ്വാധീനിച്ചേക്കാം എന്ന ആശങ്കയും കോടതി ഉത്തരവില് പങ്കുവെച്ചു.
Kerala
News
ഒടുവില് ദിവ്യ ജയിലില്: റിമാന്ഡ് ചെയ്തത് രണ്ടാഴ്ച്ചത്തേക്ക്; ദിവ്യയെ പാര്പ്പിക്കുക പള്ളിക്കുന്നിലെ വനിത ജയിലില്
Comments
No comments yet. Be the first to comment!
Leave a Comment