അന്താരാഷ്ട്ര ബഹിരാകാശ നിലയത്തിലെത്തിയ ആദ്യ മലയാളി വംശജനായ നാസ ബഹിരാകാശ സഞ്ചാരി ഡോ. അനില് മേനോന് ഐഎസ്എസില് നിന്നുള്ള തന്റെ ആദ്യ വീഡിയോ സന്ദേശം പങ്കുവെച്ചു. സൊയൂസ് എംഎസ്-29 പേടകത്തില് മറ്റ് രണ്ട് ബഹിരാകാശ സഞ്ചാരികള്ക്കൊപ്പം അദ്ദേഹം കഴിഞ്ഞ ദിവസമാണ് അന്താരാഷ്ട്ര ബഹിരാകാശ നിലയത്തിലെത്തിയത്. തന്റെ ബഹിരാകാശ യാത്രയിലെ നിര്ണായകമായ ഈ നേട്ടം ലോകമെമ്പാടുമുള്ള മലയാളി സമൂഹത്തിന് വലിയ അഭിമാന നിമിഷമായി മാറിയിരിക്കുകയാണ്.
ബഹിരാകാശത്തിലെ ആദ്യ ദിനം മികച്ച അനുഭവമായിരുന്നുവെന്ന് വ്യക്തമാക്കിയ അനില് മേനോന്, ഈ സ്വപ്നയാത്ര യാഥാര്ഥ്യമാക്കാന് പിന്തുണ നല്കിയ എല്ലാവര്ക്കും നന്ദി അറിയിച്ചു. വീഡിയോ സന്ദേശത്തിനിടെ തന്റെ ഭാര്യയോടും മക്കളോടുമുള്ള സ്നേഹം പങ്കുവെച്ച അദ്ദേഹം, മകള് ഗ്രേസിന് ബഹിരാകാശത്ത് നിന്ന് ഹൃദയസ്പര്ശിയായ പിറന്നാള് ആശംസകളും നേര്ന്നു. ബഹിരാകാശ നിലയത്തിലെ ഭാരരഹിതാവസ്ഥയില് നിന്നുള്ള അദ്ദേഹത്തിന്റെ ഈ സന്ദേശം ഇതിനകം തന്നെ സമൂഹമാധ്യമങ്ങളില് തരംഗമായിക്കഴിഞ്ഞു.
കേരളത്തിലെ ഒറ്റപ്പാലത്ത് വേരുകളുള്ള അനില് മേനോന്, നാസയുടെ ബഹിരാകാശ സഞ്ചാരിയായി തിരഞ്ഞെടുക്കപ്പെട്ട ശേഷം ആദ്യമായാണ് അന്താരാഷ്ട്ര ബഹിരാകാശ നിലയത്തിലെ ദീര്ഘകാല ദൗത്യത്തിന്റെ ഭാഗമാകുന്നത്. എട്ട് മാസത്തോളം നീളുന്ന ഈ ദൗത്യത്തില് വിവിധ ശാസ്ത്രീയ പരീക്ഷണങ്ങള്ക്കും ഗവേഷണങ്ങള്ക്കും അദ്ദേഹം നേതൃത്വം നല്കും. ബഹിരാകാശ വൈദ്യശാസ്ത്രരംഗത്തെ അദ്ദേഹത്തിന്റെ വൈദഗ്ധ്യം ഈ ദൗത്യത്തിലെ പരീക്ഷണങ്ങള്ക്ക് കൂടുതല് കരുത്ത് പകരുമെന്നാണ് വിലയിരുത്തപ്പെടുന്നത്.
Comments
No comments yet. Be the first to comment!
Leave a Comment