നിയമസഭാ തിരഞ്ഞെടുപ്പിലെ തോല്വിയെ തുടര്ന്ന് എല്ലാ മണ്ഡലങ്ങളിലെയും ഫലങ്ങള് വിശദമായി പരിശോധിക്കുമെന്ന് സിപിഐ സംസ്ഥാന സെക്രട്ടറി ബിനോയ് വിശ്വം അറിയിച്ചു. ഇത്തരം ഒരു പരാജയം പ്രതീക്ഷിച്ചിരുന്നില്ലെന്നും ഓരോ തോല്വിയുടെയും കാരണങ്ങള് സൂക്ഷ്മമായി വിലയിരുത്തുമെന്നും അദ്ദേഹം പറഞ്ഞു. നാദാപുരത്തെ സ്ഥാനാര്ഥിയെ ചുറ്റിപ്പറ്റിയ വിമര്ശനങ്ങളും പരിശോധിക്കുമെന്നും ബിനോയ് വിശ്വം കൂട്ടിച്ചേര്ത്തു.
സംസ്ഥാനത്ത് മൂന്ന് മണ്ഡലങ്ങളില് ബിജെപി വിജയിച്ചതിനെ ഗൗരവത്തോടെ കാണേണ്ടതുണ്ടെന്നും ഇത് മതേതര ശക്തികള്ക്ക് മുന്നറിയിപ്പാണെന്നും അദ്ദേഹം വ്യക്തമാക്കി.
അതേസമയം, തിരുവനന്തപുരം കഴക്കൂട്ടത്തും കൊല്ലം ചാത്തന്നൂരിലും എല്ഡിഎഫ് വോട്ടുകളില് വന് ചോര്ച്ച ഉണ്ടായതായി കണക്കുകള് സൂചിപ്പിക്കുന്നു. കഴക്കൂട്ടത്ത് ഏകദേശം 17,000 വോട്ടും ചാത്തന്നൂരില് 11,000 വോട്ടുമാണ് കഴിഞ്ഞ തിരഞ്ഞെടുപ്പിനേക്കാള് കുറവായത്. ഈ വോട്ടുകള് ബിജെപിയിലേക്ക് മാറിയതായാണ് വിലയിരുത്തല്.
ചാത്തന്നൂരിലെ തോല്വിയെ തുടര്ന്ന് മുതിര്ന്ന സിപിഐ നേതാവ് കെ ഇ ഇസ്മായില് വിമര്ശനവുമായി രംഗത്തെത്തി. സാധാരണയായി സിപിഐ വിജയിക്കുന്ന മണ്ഡലമായ ചാത്തന്നൂരില് ഇത്തവണ ബിജെപി വിജയിച്ചതിനെക്കുറിച്ച് ബിനോയ് വിശ്വം മറുപടി പറയണമെന്ന് അദ്ദേഹം ആവശ്യപ്പെട്ടു.
Comments
No comments yet. Be the first to comment!
Leave a Comment