മലപ്പുറം: വാല്പ്പാറയിലേക്ക് ഉല്ലാസയാത്രയായി പോയ നാടിന്റെ പ്രിയപ്പെട്ടവര് അപകടത്തില് മരിച്ച് ചേതനയറ്റ നിലയില് നാട്ടിലേക്ക് മടങ്ങിയെത്തിയപ്പോള്, അവസാനമായി ഒരു നോക്കുകാണാന് ആയിരങ്ങള് അമ്പലപ്പറമ്പ് ഗവ. എച്ച്എസ്എസിലേക്ക് ഒഴുകിയെത്തി. പോസ്റ്റ്മോര്ട്ടം നടപടികള് പൂര്ത്തിയാക്കിയ ശേഷം രാവിലെ ഒന്പത് പേരുടെയും മൃതദേഹങ്ങള് നാട്ടിലെത്തിച്ചു.
പൊതുദര്ശനത്തിന് ഒരു മണിക്കൂര് മാത്രമാണ് നിശ്ചയിച്ചിരുന്നെങ്കിലും, സമയം അവസാനിക്കുമ്പോഴും ബന്ധുക്കളും സുഹൃത്തുക്കളും സഹപ്രവര്ത്തകരും വിദ്യാര്ത്ഥികളും നാട്ടുകാരുമായി വലിയ തിരക്ക് തുടരുകയായിരുന്നു. ദുഃഖഭാരത്തില് മുങ്ങിയ അന്തരീക്ഷമാണ് സ്കൂള് പരിസരത്ത് കണ്ടത്.
മന്ത്രി വി. ശിവന്കുട്ടിയും സ്ഥലത്തെ എംഎല്എ മഞ്ഞളാംകുഴി അലിയും ഉള്പ്പെടെ നിരവധി ജനപ്രതിനിധികള് പൊതുദര്ശനത്തിന് എത്തിയിരുന്നു. അപകടത്തില് മരിച്ചവരില് അധ്യാപകരും, മലപ്പുറം പാങ്ങ് പള്ളിപ്പറമ്പ് ജിഎല്പി സ്കൂളിലെ ജീവനക്കാരിയും ഒരു കുട്ടിയും ഉള്പ്പെടുന്നു.
മരിച്ചവരുടെ സംസ്കാര ചടങ്ങുകള് ഇന്ന് തന്നെ വിവിധ സ്ഥലങ്ങളില് നടക്കും. അധ്യാപകന് അബ്ദുള് മജീദിന്റെയും ഭാര്യ റുഖിയയുടെയും സംസ്കാരം പാങ്ങ് മാട്ടാത്ത് ജുമാമസ്ജിദില് നടക്കും. അധ്യാപിക റംല, ഷക്കീല, പാചക തൊഴിലാളി സാജിത എന്നിവരുടെ സംസ്കാരം പാങ്ങ് വലിയ ജുമാഅത്ത് പള്ളിയിലും നടക്കും.
അധ്യാപിക അജിതയുടെ സംസ്കാരം ഷൊര്ണൂര് ശാന്തിതീരത്തും, ആശയുടെ അന്ത്യകര്മങ്ങള് കൊളത്തൂര് തറവാട്ട് വീട്ടിലും നടത്തും. സുഹറയും മകന് ഹാഷിംയും ഈസ്റ്റ് പാങ്ങ് ജുമാമസ്ജിദില് സംസ്കരിക്കും.
Comments
No comments yet. Be the first to comment!
Leave a Comment