ന്യൂഡല്ഹി: പാര്ലമെന്റിന്റെ ബജറ്റ് സമ്മേളനത്തിന് ഇന്ന് ഔദ്യോഗികമായി തുടക്കമാകും. രാവിലെ 11 മണിക്ക് രാഷ്ട്രപതി ദ്രൗപദി മുര്മു ഇരുസഭകളെയും അഭിസംബോധന ചെയ്യുന്നതോടെയാണ് സമ്മേളന നടപടികള് ആരംഭിക്കുക. സമ്മേളനത്തിന്റെ ഏറ്റവും പ്രധാന ആകര്ഷണമായ കേന്ദ്ര ബജറ്റ് ഫെബ്രുവരി ഒന്നിന് കേന്ദ്രധനമന്ത്രി നിര്മ്മല സീതാരാമന് അവതരിപ്പിക്കും. ഒമ്പത് പ്രധാന ബില്ലുകളാണ് ഇത്തവണ സര്ക്കാരിന്റെ പരിഗണനയിലുള്ളത്. ഏപ്രില് രണ്ട് വരെ നീണ്ടുനില്ക്കുന്ന സമ്മേളനം രണ്ട് ഘട്ടങ്ങളിലായാണ് ക്രമീകരിച്ചിരിക്കുന്നത്. ആദ്യഘട്ടം ഫെബ്രുവരി 13-ന് അവസാനിക്കുകയും, രണ്ടാം ഘട്ടം മാര്ച്ച് ഒമ്പതിന് ആരംഭിച്ച് ഏപ്രില് രണ്ടിന് സമാപിക്കുകയും ചെയ്യും.
നിയമനിര്മ്മാണ നടപടികള്ക്കൊപ്പം തന്നെ ശക്തമായ പ്രതിപക്ഷ പ്രതിഷേധങ്ങള്ക്കും ഇത്തവണ സഭ സാക്ഷ്യം വഹിക്കുമെന്ന് ഉറപ്പായിട്ടുണ്ട്. കേന്ദ്രസര്ക്കാര് പുതുതായി കൊണ്ടുവന്ന തൊഴിലുറപ്പ് ബില്ലിനെതിരെ ശക്തമായ പ്രതിഷേധം ഉയര്ത്താനാണ് കോണ്ഗ്രസിന്റെ തീരുമാനം. പദ്ധതിയുടെ പേര് മാറ്റുന്നതും ഘടനയില് വരുത്തുന്ന മാറ്റങ്ങളും അംഗീകരിക്കാനാവില്ലെന്നാണ് പ്രതിപക്ഷ നിലപാട്. സമ്മേളനത്തിന് മുന്നോടിയായി ഇന്നലെ ചേര്ന്ന സര്വ്വകക്ഷി യോഗത്തില് സഭയുടെ സുഗമമായ നടത്തിപ്പിന് സര്ക്കാര് സഹകരണം തേടിയെങ്കിലും, തങ്ങള് ഉന്നയിക്കുന്ന വിഷയങ്ങളില് ചര്ച്ച വേണമെന്ന കര്ശന നിലപാടിലാണ് പ്രതിപക്ഷം.
തൊഴിലുറപ്പ് പദ്ധതിയുടെ പുനഃസ്ഥാപനം, ഇന്ത്യയുടെ നിലവിലെ വിദേശനയം, വോട്ടര്പട്ടിക പരിഷ്കരണം, യു.ജി.സിയുടെ പുതിയ മാര്ഗനിര്ദേശങ്ങള് തുടങ്ങിയ ഗൗരവകരമായ വിഷയങ്ങളില് സഭയില് വിശദമായ ചര്ച്ച വേണമെന്ന് പ്രതിപക്ഷ കക്ഷികള് യോഗത്തില് ആവശ്യപ്പെട്ടു. എന്നാല്, ഈ വിഷയങ്ങള് ഇതിനോടകം തന്നെ പാര്ലമെന്റ് ചര്ച്ച ചെയ്തതാണെന്നും ബജറ്റ് സംബന്ധിച്ച കാര്യങ്ങള്ക്കായിരിക്കും സമ്മേളനത്തില് പ്രഥമ പരിഗണന നല്കുകയെന്നും സര്ക്കാര് വ്യക്തമാക്കി. ഭരണ-പ്രതിപക്ഷ തര്ക്കങ്ങള്ക്കിടയില് ബജറ്റ് സമ്മേളനം ഏറെ രാഷ്ട്രീയ പ്രാധാന്യമുള്ളതാകുമെന്ന് ഉറപ്പാണ്.
Comments
No comments yet. Be the first to comment!
Leave a Comment