കേരളത്തില് വോട്ടര്പട്ടികയിലെ ക്രമക്കേടുകള് ഒഴിവാക്കി പട്ടിക ശുദ്ധീകരിക്കുന്നതിനുള്ള തീവ്ര പരിഷ്കരണ പ്രക്രിയയുടെ വിവരശേഖരണം ഇന്ന് അവസാനിക്കും. ബി.എല്.ഒമാര് വീടുകള് സന്ദര്ശിച്ച് നടത്തുന്ന എന്യൂമറേഷന് നടപടികളാണ് ഇന്ന് പൂര്ത്തിയാകുന്നത്.
നിലവിലെ കണക്കുകള് പ്രകാരം സംസ്ഥാനത്താകെ 24,95,069 പേരുടെ എന്യൂമറേഷന് ഫോമുകള് ഇനിയും തിരികെ ലഭിക്കാനുണ്ട്. മരിച്ചവര്, സ്ഥിരമായി താമസം മാറിയവര്, ബി.എല്.ഒമാര്ക്ക് കണ്ടെത്താന് കഴിയാത്തവര് എന്നിവരാണ് പ്രധാനമായും ഈ ലിസ്റ്റില് ഉള്പ്പെട്ടിരിക്കുന്നത്. എന്യൂമറേഷന് ഫോം ലഭിക്കാത്തവരുടെ ബൂത്ത് തിരിച്ചുള്ള വിവരങ്ങള് കേന്ദ്ര തെരഞ്ഞെടുപ്പ് കമ്മീഷന് വെബ്സൈറ്റില് പ്രസിദ്ധീകരിച്ചു തുടങ്ങിയിട്ടുണ്ട്. രാഷ്ട്രീയ പാര്ട്ടികളുടെ ആവശ്യപ്രകാരമാണ് കരട് പട്ടികയ്ക്ക് മുന്പായി ഈ വിവരങ്ങള് ലഭ്യമാക്കിയത്.
വിവരശേഖരണത്തിന് ശേഷമുള്ള തുടര്ന്നുള്ള നടപടികളെക്കുറിച്ച് വിശദീകരിക്കാന് മുഖ്യ തെരഞ്ഞെടുപ്പ് ഓഫീസര് രത്തന് യു. ഖേല്ക്കര് ഇന്ന് രാവിലെ 11.30-ന് വാര്ത്താസമ്മേളനം വിളിച്ചിട്ടുണ്ട്. കരട് പട്ടിക പ്രസിദ്ധീകരിച്ച ശേഷം പേര് ചേര്ക്കാനും തിരുത്തലുകള് വരുത്താനും വോട്ടര്മാര്ക്ക് ജനുവരി 22 വരെ അവസരമുണ്ടായിരിക്കും. വരാനിരിക്കുന്ന തദ്ദേശ സ്വയംഭരണ തെരഞ്ഞെടുപ്പിന് മുന്നോടിയായി കൃത്യമായ വോട്ടര്പട്ടിക ഉറപ്പാക്കുകയാണ് ഈ നടപടിയിലൂടെ ലക്ഷ്യമിടുന്നത്.
Comments
No comments yet. Be the first to comment!
Leave a Comment