കേരളത്തില് നിന്നുള്ള മുതിര്ന്ന നേതാവ് എം എ ബേബി സിപിഎമ്മിന്റെ പുതിയ ജനറല് സെക്രട്ടറിയാകും. എംഎ ബേബിയെ സിപിഐഎം ജനറല് സെക്രട്ടറിയ്ക്കാനുള്ള ശിപാര്ശ പൊളിറ്റ് ബ്യൂറോ അംഗീകരിച്ചു. ഇന്ന് രാവിലെ ചേര്ന്ന കേന്ദ്ര കമ്മിറ്റിയിലാണ് അംഗീകാരം നല്കിയത്. ഇഎംഎസിനുശേഷം ജനറല് സെക്രട്ടറിയാകുന്ന മലയാളിയാണ് എംഎ ബേബി.
പാര്ട്ടിയുടെ ആറാമത്തെ ജനറല് സെക്രട്ടറിയാണ് ബേബി. ജനറല് സെക്രട്ടറി ആരെന്നതിനെക്കുറിച്ച് ചര്ച്ച ചെയ്യാന് ഇന്നലെ രാത്രി ചേര്ന്ന പൊളിറ്റ് ബ്യൂറോ യോഗത്തില്, 16 പിബി അംഗങ്ങളില് 11 പേരും ബേബിയെ പിന്തുണച്ചു. യോഗത്തില് പി ബി കോ-ഓര്ഡിനേറ്റര് പ്രകാശ് കാരാട്ടാണ് ബേബിയുടെ പേര് നിര്ദേശിച്ചത്.
ബംഗാളില് നിന്നുള്ള പിബി അംഗങ്ങളായ സൂര്യകാന്ത് മിശ്ര, ബംഗാള് സംസ്ഥാന സെക്രട്ടറി കൂടിയായ മുഹമ്മദ് സലിം, നീലോല്പ്പല് ബസു, രാമചന്ദ്ര ഡോം എന്നിവരും, മഹാരാഷ്ട്രയില് നിന്നുള്ള കര്ഷക നേതാവ് അശോക് ധാവളെയുമാണ് ബേബിയുടെ പേരിനെ എതിര്ത്തത്. മുഖ്യമന്ത്രി പിണറായി വിജയന് പിബിയില് തുടരുന്നതിന് ഇളവ് നല്കാനും തീരുമാനിച്ചതായാണ് വിവരം.
Comments
No comments yet. Be the first to comment!
Leave a Comment