മലപ്പുറം: മലപ്പുറത്ത് ഷിഗല്ല രോഗബാധ വീണ്ടും സ്ഥിരീകരിച്ചു. അങ്ങാടിപ്പുറത്ത് നാല് വയസ്സുകാരനാണ് രോഗം ബാധിച്ചത്. ഇതോടെ ഈ മാസം മാത്രം മലപ്പുറത്ത് ഷിഗല്ല സ്ഥിരീകരിച്ചവരുടെ എണ്ണം 12 ആയി ഉയര്‍ന്നു.
പെരിന്തല്‍മണ്ണയിലെ സ്വകാര്യ ആശുപത്രിയില്‍ ചികിത്സയില്‍ കഴിയുന്ന കുട്ടിയുടെ ആരോഗ്യനില തൃപ്തികരമാണെന്ന് ആരോഗ്യപ്രവര്‍ത്തകര്‍ അറിയിച്ചു. ഇതിനുമുമ്പ് അമരമ്പലം, ചുങ്കത്തറ, ഏലംകുളം തുടങ്ങിയ പ്രദേശങ്ങളിലും ഷിഗല്ല ബാധ റിപ്പോര്‍ട്ട് ചെയ്തിരുന്നു. ഈ പ്രദേശങ്ങള്‍ക്ക് പിന്നാലെയാണ് ഇപ്പോള്‍ അങ്ങാടിപ്പുറം പഞ്ചായത്തിലും രോഗം സ്ഥിരീകരിച്ചിരിക്കുന്നത്.
രോഗബാധയുടെ ഉറവിടം വ്യക്തത വരുത്തുന്നതിനായി ആരോഗ്യവകുപ്പ് പരിശോധനകള്‍ ശക്തമാക്കിയിട്ടുണ്ട്. ഇതിന്റെ ഭാഗമായി പ്രദേശത്തെ വിവിധ ജലസ്രോതസ്സുകളില്‍ നിന്നും സാമ്പിളുകള്‍ ശേഖരിച്ച് പരിശോധനയ്ക്കായി അയച്ചിട്ടുണ്ട്. രോഗവ്യാപനം തടയുന്നതിന്റെ ഭാഗമായി പ്രദേശത്ത് കര്‍ശന ജാഗ്രതാ നിര്‍ദ്ദേശവും പുറപ്പെടുവിച്ചിട്ടുണ്ട്.
തിളപ്പിച്ചാറിയ വെള്ളം മാത്രം കുടിക്കുക, പഴകിയതും തുറന്നുവെച്ചതുമായ ഭക്ഷണങ്ങള്‍ പൂര്‍ണ്ണമായും ഒഴിവാക്കുക, വ്യക്തിശുചിത്വം കര്‍ശനമായി പാലിക്കുക തുടങ്ങിയ മുന്‍കരുതലുകള്‍ പാലിക്കണമെന്ന് ആരോഗ്യവകുപ്പ് നിര്‍ദ്ദേശിച്ചു. പനി, വയറിളക്കം, ഛര്‍ദ്ദി തുടങ്ങിയ ലക്ഷണങ്ങള്‍ കാണപ്പെടുകയാണെങ്കില്‍ ഒട്ടും വൈകാതെ തന്നെ വൈദ്യസഹായം തേടണമെന്നും അധികൃതര്‍ മുന്നറിയിപ്പ് നല്‍കിയിട്ടുണ്ട്.
Comments
No comments yet. Be the first to comment!
Leave a Comment