തിരുവനന്തപുരം: അടൂര്‍ മണ്ഡലത്തിലെ സംഘര്‍ഷവുമായി ബന്ധപ്പെട്ട് പാര്‍ട്ടി നടപടി നേരിട്ട പാളയം പ്രദീപിന്റെ സസ്‌പെന്‍ഷന്‍ പിന്‍വലിക്കണമെന്ന ആവശ്യവുമായി രമ്യ ഹരിദാസ് എംഎല്‍എ രംഗത്തെത്തി. ഇക്കാര്യം കെപിസിസി നേതൃത്വത്തെ രമ്യ ഹരിദാസ് ഔദ്യോഗികമായി അറിയിച്ചിട്ടുണ്ട്. പാളയം പ്രദീപിന്റെ സസ്‌പെന്‍ഷന്‍ പിന്‍വലിക്കുന്ന പക്ഷം അദ്ദേഹത്തിനെതിരെ നല്‍കിയ കേസ് പിന്‍വലിക്കാന്‍ തയ്യാറാണെന്നും രമ്യ ഹരിദാസ് വ്യക്തമാക്കി.
എന്നാല്‍, പാളയം പ്രദീപിനെ തിരിച്ചെടുക്കുന്നതിനോ മണ്ഡലത്തില്‍ വീണ്ടും സജീവമാക്കുന്നതിനോ ചിറയിന്‍കീഴിലെ പ്രാദേശിക കോണ്‍ഗ്രസ് നേതാക്കള്‍ ശക്തമായ എതിര്‍പ്പ് പ്രകടിപ്പിച്ചു. ചിറയിന്‍കീഴില്‍ നടന്ന കയ്യാങ്കളിയെ തുടര്‍ന്ന് പാളയം പ്രദീപ്, സജാദ് എന്നിവരെ ആറുമാസത്തേക്ക് പാര്‍ട്ടിയില്‍ നിന്ന് സസ്‌പെന്‍ഡ് ചെയ്തിരുന്നു. കെപിസിസി അന്വേഷണ സമിതി സമര്‍പ്പിച്ച അന്വേഷണ റിപ്പോര്‍ട്ടിന്റെ അടിസ്ഥാനത്തിലാണ് ഇരുവര്‍ക്കുമെതിരെ നടപടിയെടുത്തത്.
പൊതുജനമധ്യത്തില്‍ കോണ്‍ഗ്രസ് പാര്‍ട്ടിക്ക് വലിയ അവമതിപ്പുണ്ടാക്കുന്ന വിധത്തില്‍ ഗുരുതരമായ അച്ചടക്കലംഘനമാണ് ഇരുവരുടെയും ഭാഗത്തുനിന്ന് ഉണ്ടായതെന്ന് അന്വേഷണ സമിതി കണ്ടെത്തിയിരുന്നു. ഈ റിപ്പോര്‍ട്ടിന്റെ അടിസ്ഥാനത്തില്‍ ഇരുവരെയും പാര്‍ട്ടിയുടെ പ്രാഥമിക അംഗത്വത്തില്‍ നിന്ന് കെപിസിസി പ്രസിഡന്റ് സണ്ണി ജോസഫ് സസ്‌പെന്‍ഡ് ചെയ്തതായി സംഘടനാ ചുമതലയുള്ള ജനറല്‍ സെക്രട്ടറി നെയ്യാറ്റിന്‍കര സനല്‍ പത്രക്കുറിപ്പിലൂടെ അറിയിച്ചു.
Comments
No comments yet. Be the first to comment!
Leave a Comment