അട്ടപ്പാടിയില്‍ വീണ്ടും ശിശുമരണം

പാലക്കാട്: അട്ടപ്പാടിയില്‍ വീണ്ടും ശിശുമരണം. ധോണിക്കുണ്ട് ഊരിലെ രാജി-സുനീഷ് ദമ്പതികളുടെ കുഞ്ഞാണ് പ്രസവിച്ച് ഒരു മണിക്കൂറിനുള്ളില്‍ മരിച്ചത്. അനീമിയയാണ് മരണകാരണമെന്നാണ് പ്രാഥമിക വിവരം. ഇന്ന് പുലര്‍ച്ചെ മൂന്ന് മണിയോടെ കോഴിക്കോട് മെഡിക്കല്‍ കോളജ് ആശുപത്രിയിലായിരുന്നു പ്രസവം.

അട്ടപ്പാടിയില്‍ ശിശുമരണങ്ങള്‍ തുടര്‍ക്കഥയാകുന്നത് ആശങ്ക വര്‍ധിപ്പിക്കുന്നുണ്ട്. ഈ മാസം മാത്രം മൂന്ന് കുഞ്ഞുങ്ങളാണ് മരിച്ചത്. കഴിഞ്ഞ ദിവസം 15 ദിവസം പ്രായമുള്ള ആണ്‍കുഞ്ഞും മരിച്ചിരുന്നു. വടക്കോട്ടത്തറ സ്വദേശി മുരുകേശിന്റെയും ശിവകാമിയുടെയും മകനാണ് മരിച്ചത്.

ഇതിന് മുന്‍പ് ഷോളയൂര്‍ വെച്ചുപതി ഊന്നതിയിലെ ജ്യോതിമണി-ബിജു ദമ്പതികളുടെ 20 ദിവസം പ്രായമുള്ള ആണ്‍കുഞ്ഞും മരിച്ചിരുന്നു. ഈ മാസം 21ന് തൃശൂര്‍ മെഡിക്കല്‍ കോളജ് ആശുപത്രിയിലായിരുന്നു മരണം.

പോഷകാഹാരക്കുറവാണ് അട്ടപ്പാടിയില്‍ തുടര്‍ച്ചയായ ശിശുമരണങ്ങള്‍ക്ക് കാരണമെന്ന ആരോപണവുമായി ഡിവൈഎഫ്‌ഐ ഉള്‍പ്പെടെയുള്ള പ്രതിപക്ഷ സംഘടനകള്‍ പ്രതിഷേധവുമായി രംഗത്തെത്തിയിരുന്നു. മേഖലയിലെ നിലവിലെ സാഹചര്യം വിലയിരുത്താന്‍ വിദഗ്ധ പഠനം നടത്തണമെന്ന ആവശ്യവും ശക്തമാകുന്നുണ്ട്.