തിരുവനന്തപുരം: പിഎസ്സി ചെയര്‍മാന്‍ ഡോ. എം.ആര്‍. ബൈജുവിനെ പുറത്താക്കണമെന്ന ഗവര്‍ണറുടെ ശുപാര്‍ശക്കെതിരെ പ്രതിപക്ഷ നേതാവ് പിണറായി വിജയന്‍. ഗവര്‍ണറുടെ നടപടി നിയമവിരുദ്ധവും അധികാരദുര്‍വിനിയോഗവുമാണെന്ന് അദ്ദേഹം പ്രസ്താവനയില്‍ ആരോപിച്ചു. ഗവര്‍ണര്‍മാര്‍ ഭരണഘടനാവിരുദ്ധമായി സ്വീകരിക്കുന്ന ഇത്തരം നിലപാടുകളെ യുഡിഎഫ് സര്‍ക്കാര്‍ പിന്തുണയ്ക്കുന്നുണ്ടോയെന്നും പിണറായി വിജയന്‍ ചോദിച്ചു.
പബ്ലിക് സര്‍വീസ് കമ്മീഷന്‍ അംഗങ്ങളുടെ നിയമനവും കാലാവധിയും സംബന്ധിച്ച ഭരണഘടനാ വ്യവസ്ഥകള്‍ ചൂണ്ടിക്കാട്ടിയാണ് പ്രതിപക്ഷ നേതാവിന്റെ വിമര്‍ശനം. ഇന്ത്യന്‍ ഭരണഘടനയുടെ ആര്‍ട്ടിക്കിള്‍ 316 പ്രകാരമാണ് പിഎസ്സി അംഗങ്ങളെ നിയമിക്കുന്നത്. ഇതനുസരിച്ച് അംഗങ്ങള്‍ക്ക് ആറു വര്‍ഷത്തെ കാലാവധിയാണുള്ളത്.
കാലാവധി പൂര്‍ത്തിയാകുന്നതിനു മുമ്പ് ഒരംഗത്തെ നീക്കം ചെയ്യണമെങ്കില്‍ ഭരണഘടനയുടെ ആര്‍ട്ടിക്കിള്‍ 317 പ്രകാരമുള്ള നടപടിക്രമങ്ങള്‍ പാലിക്കേണ്ടതുണ്ടെന്നും പിണറായി വിജയന്‍ പറഞ്ഞു. അംഗങ്ങളുടെ ഭാഗത്തുനിന്നുള്ള ദുര്‍നടത്തം സംബന്ധിച്ച പരാതിയില്‍ സുപ്രീംകോടതി അന്വേഷണം നടത്തി, നീക്കം ചെയ്യേണ്ടതാണെന്ന് റിപ്പോര്‍ട്ട് ചെയ്തതിനുശേഷം മാത്രമേ രാഷ്ട്രപതിക്ക് ഇക്കാര്യത്തില്‍ തീരുമാനമെടുക്കാനാകൂവെന്നാണ് അദ്ദേഹത്തിന്റെ വാദം.
കേരളത്തിലെ പിഎസ്സി അംഗങ്ങള്‍ക്കെതിരെ ഇത്തരമൊരു അന്വേഷണവിചാരണ സുപ്രീംകോടതിയില്‍ നടന്നിട്ടില്ലെന്നും അതിനാല്‍ പുറത്താക്കല്‍ ശുപാര്‍ശ നല്‍കാന്‍ ഗവര്‍ണര്‍ക്ക് ഭരണഘടനാപരമായ അധികാരമില്ലെന്നും പിണറായി വിജയന്‍ ആരോപിച്ചു.
സ്ഥാനം ഒഴിയുന്നതിന് തൊട്ടുമുമ്പ് ഗവര്‍ണര്‍ നടത്തിയ ഈ നീക്കം സംസ്ഥാനത്ത് നേരത്തേ നടത്തിയ നിയമവിരുദ്ധ ഇടപെടലുകളുടെ തുടര്‍ച്ചയാണെന്നും അദ്ദേഹം വിമര്‍ശിച്ചു. ഗവര്‍ണറുടെ ശുപാര്‍ശയും അതിന്റെ ഭരണഘടനാപരമായ സാധുതയും സംബന്ധിച്ച വിവാദം ഇതോടെ കൂടുതല്‍ ശക്തമായിരിക്കുകയാണ്.
Comments
No comments yet. Be the first to comment!
Leave a Comment