തിരുവനന്തപുരം: കേരള പബ്ലിക് സര്‍വീസ് കമ്മീഷന്‍ (പിഎസ്സി) അംഗങ്ങളുടെ നിയമന ചട്ടഭേദഗതിക്ക് സംസ്ഥാന സര്‍ക്കാര്‍ ഒരുങ്ങുന്നു. പിഎസ്സി അംഗങ്ങള്‍ക്ക് നിര്‍ദിഷ്ട യോഗ്യതകള്‍ നിശ്ചയിക്കുന്നത് ഉള്‍പ്പെടെയുള്ള പ്രധാന ഭേദഗതികളാണ് കൊണ്ടുവരുന്നത്. നിലവില്‍ 10 വര്‍ഷത്തെ സര്‍ക്കാര്‍ ജോലി പരിചയം മാത്രമാണ് അംഗങ്ങളുടെ നിയമനത്തിനുള്ള യോഗ്യതയായി കരുതുന്നത്. സംസ്ഥാന ഗവര്‍ണര്‍ നിയമിക്കുന്ന പിഎസ്സി ചെയര്‍മാന്റെയും അംഗങ്ങളുടെയും കാലാവധി 6 വര്‍ഷം അല്ലെങ്കില്‍ 62 വയസ്സ് തികയുന്നത് വരെയാണ്.
പിഎസ്സി നടത്തുന്ന പരീക്ഷകളിലെ ക്രമക്കേടുകള്‍ മൂലം കമ്മീഷന്‍ പ്രതിക്കൂട്ടില്‍ നില്‍ക്കുന്ന പശ്ചാത്തലത്തിലാണ് സര്‍ക്കാരിന്റെ ഈ നീക്കം. കമ്മീഷന്റെ ചോര്‍ന്നുപോയ വിശ്വാസ്യത തിരിച്ചുപിടിക്കുക എന്ന ലക്ഷ്യം കൂടി ഇതിനു പിന്നിലുണ്ട്. അതിനിടെ, പിഎസ്സി ചെയര്‍മാന്‍ ഡോ. എം.ആര്‍. ബൈജുവിനെയും അംഗങ്ങളെയും പുറത്താക്കണമെന്നാവശ്യപ്പെട്ട് ഗവര്‍ണര്‍ രാജേന്ദ്ര വിശ്വനാഥ് അര്‍ലേക്കര്‍ രാഷ്ട്രപതിക്ക് അസാധാരണ ശിപാര്‍ശ അയച്ചിരുന്നു. സ്ഥാനം ഒഴിയുന്നതിന് ഒരാഴ്ച മുന്‍പാണ് ഗവര്‍ണര്‍ ഈ നടപടിയെടുത്തത്.
പരീക്ഷാ ക്രമക്കേടില്‍ പിഎസ്സിക്ക് ഗുരുതരമായ വീഴ്ച സംഭവിച്ചതായി ആഭ്യന്തര വിജിലന്‍സിന്റെയും ക്രൈംബ്രാഞ്ച് എസ്ഐടിയുടെയും കണ്ടെത്തലുകളുണ്ട്. ആസൂത്രണ ബോര്‍ഡ് പരീക്ഷാ തട്ടിപ്പില്‍ കൂടുതല്‍ പിഎസ്സി ഉദ്യോഗസ്ഥരെ പ്രതി ചേര്‍ക്കാന്‍ അന്വേഷണസംഘം നീക്കം നടത്തുന്നതിനിടെയാണ് ഗവര്‍ണറുടെ ശിപാര്‍ശ പുറത്തുവന്നതും, തൊട്ടുപിന്നാലെ നിയമന ചട്ടങ്ങള്‍ ഭേദഗതി ചെയ്യാന്‍ സര്‍ക്കാര്‍ നിര്‍ബന്ധിതരായതും.
Comments
No comments yet. Be the first to comment!
Leave a Comment