തിരുവനന്തപുരം: സിപിഐഎമ്മില്‍ പാര്‍ട്ടിയിലെ പീഡന പരാതികള്‍ കൈകാര്യം ചെയ്യുന്നതിനായി ആഭ്യന്തര പരാതി പരിഹാര സമിതി (ICC) രൂപീകരിക്കുന്നു. കേന്ദ്ര കമ്മിറ്റിയാണ് ഇത്തരം പരാതികള്‍ അന്വേഷിക്കുന്നതിനായി ഐസിസി രൂപീകരിക്കാന്‍ നിര്‍ദ്ദേശം നല്‍കിയത്. ഇതോടെ പരാതികള്‍ പാര്‍ട്ടി കമ്മിറ്റികള്‍ നേരിട്ട് കൈകാര്യം ചെയ്യുന്ന രീതി അവസാനിപ്പിക്കും. കേന്ദ്ര കമ്മിറ്റിയുടെ ഈ നിര്‍ണായക തീരുമാനം സംസ്ഥാന സമിതിയില്‍ റിപ്പോര്‍ട്ട് ചെയ്തു.
ബന്ധപ്പെട്ട പാര്‍ട്ടി ഘടകങ്ങളിലെ ഐസിസിയായിരിക്കും പരാതികളില്‍ അന്വേഷണം നടത്തി തീരുമാനമെടുക്കുക. ഐസിസിയുടെ തീരുമാനം അന്തിമമായിരിക്കും; ഇതില്‍ മാറ്റം വരുത്താന്‍ പാര്‍ട്ടി കമ്മിറ്റികള്‍ക്ക് അധികാരമുണ്ടായിരിക്കില്ല. ഈ തീരുമാനത്തിനെതിരെ അപ്പീല്‍ ഉണ്ടെങ്കില്‍ മേല്‍ക്കമ്മിറ്റിയിലെ ഐസിസിയാകും അത് പരിഗണിക്കുക. ഐസിസി പാര്‍ട്ടി ഘടകങ്ങളില്‍ നിര്‍ബന്ധമായ ഒരു സംവിധാനമായി മാറ്റണമെന്നാണ് കേന്ദ്ര കമ്മിറ്റിയുടെ നിര്‍ദേശം.
ലിംഗസമത്വത്തിലൂന്നിയ പുരോഗമന നിലപാട് ഉയര്‍ത്തിപ്പിടിക്കുന്ന പാര്‍ട്ടിയെന്ന നിലയിലാണ് കേന്ദ്ര കമ്മിറ്റി ഈ സുപ്രധാന തീരുമാനമെടുത്തത്. കേവലം പാര്‍ട്ടി നേതാക്കന്മാര്‍ മാത്രമായിരിക്കില്ല ഐസിസിയില്‍ ഉള്‍പ്പെടുന്നത്; അഭിഭാഷകര്‍ ഉള്‍പ്പെടെയുള്ള വിദഗ്ധരും സമിതിയുടെ ഭാഗമാകും.
അതിനിടെ, രാഷ്ട്രീയ സംഘടനാ പ്രവര്‍ത്തനങ്ങള്‍ക്കായി ഒരു വര്‍ഷത്തെ കലണ്ടര്‍ തയാറാക്കാനും സിപിഐഎം തീരുമാനിച്ചിട്ടുണ്ട്. ഇന്ന് സമാപിക്കുന്ന പാര്‍ട്ടി സംസ്ഥാന സമിതി യോഗം ഭാവി പ്രവര്‍ത്തനങ്ങള്‍ക്കുള്ള കലണ്ടറിന് അന്തിമരൂപം നല്‍കും. ഇതിന്റെ ഭാഗമായി പാര്‍ട്ടിയുടെ വിവിധ തലങ്ങളിലുള്ള കമ്മിറ്റികള്‍, രാഷ്ട്രീയ സെമിനാറുകള്‍, ബഹുജന സംഘടനാ യോഗങ്ങള്‍ എന്നിവ ഈ കാലയളവില്‍ സംഘടിപ്പിക്കും. പാര്‍ട്ടിയെ സംഘടനാപരമായും രാഷ്ട്രീയമായും കൂടുതല്‍ ശക്തിപ്പെടുത്തുകയാണ് ഇതിലൂടെ ലക്ഷ്യമിടുന്നത്.
Comments
No comments yet. Be the first to comment!
Leave a Comment