തിരുവനന്തപുരം: വിവാദങ്ങള്‍ക്കിടെ യുഡിഎഫ് സര്‍ക്കാരിന്റെ പുതിയ മദ്യനയം നവംബര്‍ 30നകം പ്രഖ്യാപിക്കാന്‍ നീക്കം. ഇതുമായി ബന്ധപ്പെട്ട് എക്‌സൈസ് വകുപ്പ് കരട് തയ്യാറാക്കി. യുഡിഎഫ് യോഗത്തില്‍ കരട് ചര്‍ച്ച ചെയ്ത ശേഷമായിരിക്കും അന്തിമ മദ്യനയം പ്രഖ്യാപിക്കുക.
വീര്യം കൂടിയ ഹോര്‍ട്ടി വൈന്‍ വില്‍പ്പനയ്ക്ക് അനുമതി നല്‍കിയ ഉത്തരവ് സര്‍ക്കാരിനെ വിവാദത്തിലാക്കിയിരുന്നു. പുതിയ മദ്യനയം പ്രഖ്യാപിക്കുന്നതിന് തൊട്ടുമുമ്പുണ്ടായ ഈ സംഭവത്തില്‍ എക്‌സൈസ് വകുപ്പിനെതിരെ വിമര്‍ശനങ്ങളും ഉയര്‍ന്നിരുന്നു. മദ്യനിരോധന സമിതി പ്രതിനിധികള്‍, ബാറുടമകള്‍, മുന്‍ എക്‌സൈസ് മന്ത്രിമാര്‍ എന്നിവരുമായി ചര്‍ച്ച നടത്തിയ ശേഷമാണ് സര്‍ക്കാര്‍ നയത്തിന്റെ അന്തിമഘട്ടത്തിലേക്ക് കടന്നത്.
ബാറുകളുടെ പ്രവര്‍ത്തനരീതി, സമയക്രമം, ഐടി പാര്‍ക്കുകളിലെ മദ്യവില്‍പ്പന, ടൂറിസം മേഖലയിലെ മദ്യവില്‍പ്പന തുടങ്ങിയ വിഷയങ്ങളില്‍ പുതിയ നയത്തില്‍ മാറ്റങ്ങളുണ്ടാകുമെന്നാണ് സൂചന. എക്‌സൈസ് വകുപ്പ് തയ്യാറാക്കിയ കരട് യുഡിഎഫ് യോഗത്തില്‍ വിശദമായി ചര്‍ച്ച ചെയ്ത ശേഷമായിരിക്കും പ്രഖ്യാപനം.
അതേസമയം, ഹോര്‍ട്ടി വൈന്‍ വില്‍പ്പനയ്ക്ക് അനുമതി നല്‍കിയതില്‍ ബന്ധപ്പെട്ട ഉദ്യോഗസ്ഥന് ഗുരുതര വീഴ്ച സംഭവിച്ചതായി എക്‌സൈസ് കമ്മീഷണറുടെ അന്വേഷണ റിപ്പോര്‍ട്ടില്‍ വ്യക്തമാക്കുന്നു. എല്‍ഡിഎഫ് സര്‍ക്കാരിന്റെ തുടര്‍ച്ചയല്ല യുഡിഎഫ് സര്‍ക്കാരെന്ന് ഉദ്യോഗസ്ഥര്‍ മനസ്സിലാക്കണമെന്ന നിര്‍ദേശവും വകുപ്പ് മന്ത്രി നല്‍കിയിട്ടുണ്ട്.
എന്നാല്‍, മാനദണ്ഡങ്ങള്‍ പൂര്‍ണമായും പാലിച്ചാണ് വില്‍പ്പനയ്ക്ക് അനുമതി നല്‍കിയതെന്നാണ് ചുമതലയില്‍നിന്ന് മാറ്റിനിര്‍ത്തപ്പെട്ട അബ്കാരി ഡെപ്യൂട്ടി കമ്മീഷണര്‍ അനില്‍കുമാറിന്റെ വിശദീകരണം. പുതിയ എക്‌സൈസ് കമ്മീഷണര്‍ ചുമതലയേറ്റതിന് പിന്നാലെ ഫയല്‍ നീക്കം ഇത്ര വേഗത്തിലായതെങ്ങനെയെന്ന കാര്യത്തിലും അന്വേഷണം നടത്തുമെന്നാണ് വിവരം.
Comments
No comments yet. Be the first to comment!
Leave a Comment