തിരുവനന്തപുരം: മാസപ്പടി ഇടപാടുമായി ബന്ധപ്പെട്ട അന്വേഷണത്തിന്റെ ഭാഗമായി എന്‍ഫോഴ്സ്മെന്റ് ഡയറക്ടറേറ്റിനോട് (ഇ.ഡി) രേഖകളും തെളിവുകളും ആവശ്യപ്പെട്ട് വിജിലന്‍സ്. മാസപ്പടി ഇടപാടുകള്‍, സംശയിക്കുന്ന ഹവാല ഇടപാടുകള്‍, ഇ.ഡി അന്വേഷണത്തില്‍ ശേഖരിച്ച തെളിവുകള്‍, മൊഴികളുടെ വിശദാംശങ്ങള്‍ എന്നിവയാണ് വിജിലന്‍സ് ആവശ്യപ്പെട്ടിരിക്കുന്നത്. ഇതിനിടെ, പിണറായി വിജയന്റെ വസതിയിലെ പരിശോധനയ്ക്കുശേഷം മടങ്ങിയ ഇ.ഡി ഉദ്യോഗസ്ഥരെ ആക്രമിച്ച കേസിലെ മൂന്ന് പ്രതികളുടെ ജാമ്യം റദ്ദാക്കണമെന്നാവശ്യപ്പെട്ട് പൊലീസ് കോടതിയെ സമീപിച്ചു.
കോടതി നിര്‍ദേശപ്രകാരം വിജിലന്‍സ് രജിസ്റ്റര്‍ ചെയ്ത മുഖ്യമന്ത്രി പിണറായി വിജയനും മന്ത്രി മുഹമ്മദ് റിയാസിനുമെതിരായ കേസുകള്‍ രണ്ട് പ്രത്യേക അന്വേഷണ സംഘങ്ങളാണ് (എസ്ഐടി) അന്വേഷിക്കുന്നത്. തുടര്‍ അന്വേഷണത്തിന്റെ ഭാഗമായാണ് ഇ.ഡിയില്‍നിന്ന് കൂടുതല്‍ വിവരങ്ങള്‍ ലഭ്യമാക്കാന്‍ വിജിലന്‍സ് കത്ത് നല്‍കിയത്.
ഇ.ഡി പൊലീസ് മേധാവിക്ക് സമര്‍പ്പിച്ച റിപ്പോര്‍ട്ടില്‍ പരാമര്‍ശിച്ച മാസപ്പടി ഇടപാടിന്റെ വിവരങ്ങളും ഹവാല ഇടപാട് നടന്നതായി സംശയിക്കാന്‍ ഇടയാക്കുന്ന തെളിവുകളും അന്വേഷണവുമായി ബന്ധപ്പെട്ട മൊഴികളുടെ വിശദാംശങ്ങളുമാണ് വിജിലന്‍സ് തേടിയിരിക്കുന്നത്. ലഭിക്കുന്ന രേഖകള്‍ പരിശോധിച്ചശേഷം ചോദ്യം ചെയ്യല്‍ നടപടികളിലേക്ക് കടക്കാനാണ് അന്വേഷണ സംഘത്തിന്റെ നീക്കം.
Comments
No comments yet. Be the first to comment!
Leave a Comment