തിരുവനന്തപുരം: സംസ്ഥാനത്ത് ഇന്ന് ഒറ്റപ്പെട്ടയിടങ്ങളില് താപനില സാധാരണയേക്കാള് മൂന്ന് മുതല് നാല് ഡിഗ്രി സെല്ഷ്യസ് വരെ ഉയരാന് സാധ്യതയെന്ന് കേന്ദ്ര കാലാവസ്ഥ വകുപ്പ്. ഉയര്ന്ന ചൂടിന്റെ പശ്ചാത്തലത്തില് ജാഗ്രത പാലിക്കണമെന്ന് സംസ്ഥാന ദുരന്തനിവാരണ അതോറിറ്റി മുന്നറിയിപ്പ് നല്കി.
അതേസമയം, ഇന്ന് പ്രഖ്യാപിച്ചിരുന്ന മഴ മുന്നറിയിപ്പുകള് പിന്വലിച്ചു. നാളെ നാല് ജില്ലകളില് ശക്തമായ മഴയ്ക്ക് സാധ്യതയുള്ളതിനാല് യെല്ലോ അലേര്ട്ട് പ്രഖ്യാപിച്ചിട്ടുണ്ട്. എറണാകുളം, ഇടുക്കി, കോട്ടയം, പത്തനംതിട്ട ജില്ലകളിലാണ് നാളെ യെല്ലോ അലേര്ട്ട്.
മറ്റന്നാളും നാല് ജില്ലകളില് മഴ മുന്നറിയിപ്പുണ്ട്. എന്നാല് സെപ്റ്റംബര് 13 മുതല് മഴയുടെ തോത് വീണ്ടും കുറയുമെന്നാണ് കേന്ദ്ര കാലാവസ്ഥ വകുപ്പിന്റെ മുന്നറിയിപ്പ്.
ഉയര്ന്ന ചൂട് തുടരുന്നതിനാല് സൂര്യാഘാതം, സൂര്യാതപം, നിര്ജലീകരണം തുടങ്ങിയ ആരോഗ്യപ്രശ്നങ്ങള്ക്ക് സാധ്യതയുണ്ട്. പുറത്തിറങ്ങുമ്പോള് ആവശ്യമായ മുന്കരുതലുകള് സ്വീകരിക്കണമെന്നും അധികൃതര് നിര്ദേശിച്ചു. കുട, സണ്ഗ്ലാസ് എന്നിവ ഉപയോഗിക്കുന്നതിനൊപ്പം അയഞ്ഞതും ഇളം നിറത്തിലുള്ളതുമായ കോട്ടണ് വസ്ത്രങ്ങള് ധരിക്കണം.
നിര്ജലീകരണം ഒഴിവാക്കുന്നതിനായി ഇടയ്ക്കിടെ ധാരാളം വെള്ളം കുടിക്കണമെന്നും നേരിട്ട് വെയില് ഏല്ക്കുന്നത് പരമാവധി ഒഴിവാക്കണമെന്നും മുന്നറിയിപ്പുണ്ട്.
Comments
No comments yet. Be the first to comment!
Leave a Comment