സംസ്ഥാനത്ത് അടുത്ത മൂന്ന് ദിവസവും ശക്തമായ മഴയ്ക്ക് സാധ്യതയെന്ന് കേന്ദ്ര കാലാവസ്ഥാ വകുപ്പ് മുന്നറിയിപ്പ് നല്കി. തെക്കന് തമിഴ്നാട് തീരത്തുള്ള ചക്രവാതച്ചുഴിയും പസഫിക് മഹാസമുദ്രത്തിലെ ഡോള്ഫിന് ചുഴലിക്കാറ്റിന്റെ സ്വാധീനവുമാണ് മഴ ശക്തമാകാന് കാരണമെന്നാണ് കാലാവസ്ഥാ വിദഗ്ധര് വിലയിരുത്തുന്നത്.
ഇന്ന് ഒമ്പത് ജില്ലകളില് ഓറഞ്ച് അലര്ട്ട് പ്രഖ്യാപിച്ചിട്ടുണ്ട്. കനത്ത മഴയുടെ പശ്ചാത്തലത്തില് പത്ത് ജില്ലകളിലെ വിദ്യാഭ്യാസ സ്ഥാപനങ്ങള്ക്ക് അവധി നല്കിയിട്ടുണ്ട്. അടുത്ത മൂന്ന് ദിവസവും സംസ്ഥാനത്തെ 14 ജില്ലകളിലും മഴ മുന്നറിയിപ്പ് തുടരുകയാണ്. മധ്യകേരളത്തിലും വടക്കന് കേരളത്തിലും ശക്തമായ മഴ തുടരുമെന്നും, മലയോര മേഖലകളില് പ്രത്യേക ജാഗ്രത പാലിക്കണമെന്നും അധികൃതര് നിര്ദേശിച്ചു.
മഴക്കെടുതിയില് ഇതുവരെ 26 പേര് മരിച്ചതായി ഔദ്യോഗിക കണക്കുകള് വ്യക്തമാക്കുന്നു. സംസ്ഥാനത്താകെ 462 ദുരിതാശ്വാസ ക്യാമ്പുകളിലായി 27,048 പേരെ മാറ്റിപ്പാര്പ്പിച്ചിട്ടുണ്ട്.
കനത്ത മഴയെ തുടര്ന്ന് 53 വീടുകള് പൂര്ണമായും 588 വീടുകള് ഭാഗികമായും തകര്ന്നതായി സര്ക്കാര് അറിയിച്ചു. മഴക്കെടുതിയില് ഇതുവരെ 67.44 കോടി രൂപയുടെ നഷ്ടമുണ്ടായതായി മുഖ്യമന്ത്രി അറിയിച്ചു. ജലനിരപ്പ് ഉയര്ന്ന സാഹചര്യത്തില് സംസ്ഥാനത്തെ 14 ഡാമുകള് നിലവില് തുറന്ന് വെള്ളം ഒഴുക്കിവിടുന്നുണ്ട്. സ്ഥിതിഗതികള് വിലയിരുത്തി ആവശ്യമായ മുന്കരുതല് നടപടികള് തുടരുകയാണെന്നും അധികൃതര് അറിയിച്ചു.
Comments
No comments yet. Be the first to comment!
Leave a Comment