കോട്ടയം: പാലാ നഗരസഭയില് പ്രതിപക്ഷം അവതരിപ്പിച്ച അവിശ്വാസ പ്രമേയം പാസായതോടെ യുഡിഎഫിന് നഗരസഭയിലെ ഭരണാധികാരം നഷ്ടമായി. കോണ്ഗ്രസിലെ നാല് കൗണ്സിലര്മാര് അവിശ്വാസ പ്രമേയത്തെ അനുകൂലിച്ച് വോട്ട് ചെയ്തതും ഭരണപക്ഷത്തിന് നിര്ണായക തിരിച്ചടിയായി. വൈസ് ചെയര്മാന് മായാ രാഹുലും അവിശ്വാസ പ്രമേയത്തെ പിന്തുണച്ചു.
അതേസമയം, ജോസഫ് ഗ്രൂപ്പിലെ മൂന്ന് കൗണ്സിലര്മാരും കോണ്ഗ്രസിലെ രണ്ട് കൗണ്സിലര്മാരും വോട്ടെടുപ്പില് നിന്ന് വിട്ടുനിന്നു. പുളിക്കകണ്ടം വാര്ഡിലെ കൗണ്സിലര്മാര് യോഗത്തില് പങ്കെടുക്കാതിരിക്കുകയും ചെയ്തു.
അവിശ്വാസ പ്രമേയം പരാജയപ്പെടുത്താന് കോണ്ഗ്രസ് ജില്ലാ നേതൃത്വം വിമത നിലപാട് സ്വീകരിച്ച കൗണ്സിലര്മാര്ക്ക് വിപ്പ് നല്കിയിരുന്നെങ്കിലും അത് ഫലപ്രദമായില്ല. പുളിക്കകണ്ടം കൗണ്സിലര്മാരുമായി യോജിച്ച് മുന്നോട്ട് പോകാനാകില്ലെന്ന നിലപാടിലായിരുന്നു വിമത കോണ്ഗ്രസ് അംഗങ്ങള്.
കഴിഞ്ഞ ഏതാനും മാസങ്ങളായി പാലാ നഗരസഭയില് ഭരണപക്ഷത്തിനുള്ളിലെ ഭിന്നതകള് രൂക്ഷമായിരുന്നു. ഭരണസഖ്യത്തിനുള്ളിലെ പൊട്ടിത്തെറിയും ആഭ്യന്തര കലഹങ്ങളും ശക്തമായതോടെയാണ് പ്രതിപക്ഷം അവിശ്വാസ പ്രമേയം കൊണ്ടുവന്നത്. ഒടുവില് പ്രമേയം പാസായതോടെ നഗരസഭയിലെ യുഡിഎഫ് ഭരണത്തിന് വിരാമമായി.
Comments
No comments yet. Be the first to comment!
Leave a Comment