തിരുവനന്തപുരത്ത് ഗുണ്ടാ ആക്രമണം; പിതാവിനും പ്ലസ് ടു വിദ്യാര്‍ഥിയായ മകനും ക്രൂര മര്‍ദനം

തിരുവനന്തപുരം: നഗരത്തില്‍ വീണ്ടും ഗുണ്ടാ ആക്രമണം. ഇരുചക്രവാഹനത്തില്‍ സഞ്ചരിക്കുകയായിരുന്ന പിതാവിനെയും 17 വയസ്സുകാരനായ മകനെയും ഗുണ്ടാ നേതാവ് തകരപ്പറമ്പ് കുട്ടന്റെ നേതൃത്വത്തിലുള്ള സംഘം മര്‍ദിച്ചതായി പരാതി.

കഴിഞ്ഞ ദിവസം രാത്രി എട്ട് മണിയോടെയാണ് വഞ്ചിയൂരിന് സമീപം സംഭവം നടന്നത്. ട്യൂഷന്‍ കഴിഞ്ഞ് വീട്ടിലേക്ക് മടങ്ങുകയായിരുന്ന രാജേഷും പ്ലസ് ടു വിദ്യാര്‍ഥിയായ മകന്‍ അഭിനവും ആക്രമണത്തിനിരയായത്.

വാഹനം മാറ്റുന്നതിനായി ഹോണ്‍ മുഴക്കിയതാണ് ആക്രമണത്തിന് കാരണമായതെന്നാണ് പ്രാഥമിക നിഗമനം. ഇതേ തുടര്‍ന്ന് ഇരുവരെയും തടഞ്ഞുനിര്‍ത്തി മര്‍ദിക്കുകയായിരുന്നുവെന്നാണ് വിവരം.

ആക്രമണത്തില്‍ പരിക്കേറ്റ പിതാവിനും മകനും ചികിത്സ തേടിയിട്ടുണ്ട്. സംഭവത്തില്‍ പൊലീസ് അന്വേഷണം ആരംഭിച്ചു. ആക്രമണത്തില്‍ പങ്കെടുത്തവരെ തിരിച്ചറിയാനും പിടികൂടാനുമുള്ള നടപടികള്‍ പുരോഗമിക്കുകയാണെന്ന് പൊലീസ് അറിയിച്ചു.