രാജ്യത്തിന് മാതൃകയായ നഗരമാക്കി കൊച്ചിയെ മാറ്റും: മുഖ്യമന്ത്രി വി ഡി സതീശന്‍

രാജ്യത്തിന് മാതൃകയായ നഗരമായി കൊച്ചിയെ വികസിപ്പിക്കുകയാണ് സര്‍ക്കാരിന്റെ ലക്ഷ്യമെന്ന് മുഖ്യമന്ത്രി വി ഡി സതീശന്‍. കേരള ഫിലിം ഇന്‍ഡസ്ട്രിയുടെ ആസ്ഥാനമായി കൊച്ചിയെ മാറ്റാനുള്ള പദ്ധതികളുമായി സര്‍ക്കാര്‍ മുന്നോട്ടുപോകുകയാണെന്നും അദ്ദേഹം വ്യക്തമാക്കി. എറണാകുളം ഡിസിസിയുടെ നേതൃത്വത്തില്‍ കൊച്ചിയില്‍ സംഘടിപ്പിച്ച സ്വീകരണ പരിപാടിയില്‍ സംസാരിക്കുകയായിരുന്നു മുഖ്യമന്ത്രി.

ജീവിതത്തിലെ ഏറ്റവും ധന്യമായ മുഹൂര്‍ത്തത്തിലൂടെയാണ് താന്‍ കടന്നുപോകുന്നതെന്ന് മുഖ്യമന്ത്രി പറഞ്ഞു. അധികാരത്തിന്റെ ആഡംബരങ്ങളില്‍ അകപ്പെട്ടാല്‍ ജനങ്ങള്‍ക്കായി ഒന്നും ചെയ്യാന്‍ കഴിയില്ലെന്നും അതിനെ മറികടക്കേണ്ടതുണ്ടെന്നും അദ്ദേഹം ചൂണ്ടിക്കാട്ടി. കേരളത്തില്‍ മാറ്റമുണ്ടാക്കാന്‍ കഴിയുമെന്ന ആത്മവിശ്വാസത്തോടെയാണ് സര്‍ക്കാര്‍ മുന്നോട്ട് പോകുന്നതെന്നും മുഖ്യമന്ത്രി വ്യക്തമാക്കി.

ധനകാര്യ വകുപ്പ് ഏറ്റെടുത്തത് വലിയൊരു വെല്ലുവിളിയായാണെന്നും കേരളത്തിന്റെ സമ്പദ് വ്യവസ്ഥ ശക്തിപ്പെടുത്തുകയാണ് പ്രധാന ലക്ഷ്യമെന്നും അദ്ദേഹം പറഞ്ഞു. സമ്പത്തിന്റെ നീതിപൂര്‍വ്വമായ വിതരണം ഉറപ്പാക്കുമെന്നും ജനങ്ങളുടെ ജീവിത നിലവാരത്തില്‍ ഗണ്യമായ മാറ്റങ്ങള്‍ ഉണ്ടാക്കുന്ന പദ്ധതികളാണ് സര്‍ക്കാര്‍ ആവിഷ്‌കരിക്കുന്നതെന്നും മുഖ്യമന്ത്രി കൂട്ടിച്ചേര്‍ത്തു.